డిజిటల్ యుగంలో దాగి ఉన్న ప్రమాదకర ఉచ్చు

సాంకేతిక విప్లవం-కొత్త నేరాల పుట్టుక

డిజిటల్ యుగంలో సోషల్ మీడియా,వీడియో కాల్స్ ద్వారా వ్యక్తులను మోసగాళ్లు వలన పునాదులు విస్తరిస్తున్నారు.

హనీ ట్రాప్-మోసం మాత్రమే కాదు,విధ్వంసం:ప్రేమ,స్నేహం పేరుతో వ్యక్తిగత సమాచారాన్ని దోచి,బ్లాక్‌మెయిల్ చేస్తూ కుటుంబాలు,సమాజం వరకు ప్రభావితం చేస్తుంది.

చదువుకున్నవారూ చిక్కుతున్న ఉచ్చు:కేవలం అమాయకులు మాత్రమే కాకుండా చదువుకున్నవారు,ఉన్నతాధికారులు కూడా ఈ మోసంలో చిక్కుతున్నారు.

పరువు నష్టం-అసలు గాయం:ఆర్థిక నష్టం కన్నా పరువు పోవడం,మానసిక ఒత్తిడి,కుటుంబ విభేదాలు,కొన్ని సందర్భాల్లో ఆత్మహత్య ఆలోచనలు ప్రధాన సమస్యలు.

ప్రభుత్వాల పాత్ర కీలకం:కఠిన చట్టాలు,ఫాస్ట్ ట్రాక్ కోర్టులు,ప్రత్యేక నేర గుర్తింపు ద్వారా హనీ ట్రాప్ నియంత్రణ అవసరం.

సోషల్ మీడియా సంస్థల బాధ్యత:ఫేక్ అకౌంట్ల తొలగింపు,డేటా భద్రత,వినియోగదారుల భద్రతకు స్పష్టమైన బాధ్యత.

అవగాహన-అతి పెద్ద ఆయుధం:పాఠశాలలు,కళాశాలలు,గ్రామ-పట్టణ స్థాయి ప్రచారాలు-ప్రజల్లో జాగ్రత్త భావన నాటడం.

బాధితులకు భరోసా అవసరం:
గోప్యత భరోసా,ఉచిత లీగల్ ఎయిడ్,మానసిక సలహాలు-బాధితులకు ధైర్యం కల్పించడం.

చట్టాలు మాత్రమే సరిపోవు:ప్రతి ఒక్కరూ జాగ్రత్తగా ఉండకపోతే,చట్టాలే కేవలం మోసాన్ని ఆపలేవు.

సమిష్టి పోరాటమే పరిష్కారం:ప్రజల అప్రమత్తత,ప్రభుత్వాల కఠిన చర్యలు,సమాజపు సహకారం కలిసినప్పుడు మాత్రమే హనీ ట్రాప్‌కు నిజమైన పరిష్కారం.

సాంకేతిక పరిజ్ఞానం మన జీవితాలను వేగవంతం చేసినప్పటికీ,అదే సమయంలో మన భద్రతను ప్రశ్నించే కొత్త రకాల నేరాలకు దారి తీసింది.వాటిలో అత్యంత భయంకరంగా,నిశ్శబ్దంగా విస్తరిస్తున్న మోసం-హనీ ట్రాప్.ప్రేమ,స్నేహం,ఆకర్షణ పేరుతో వ్యక్తుల బలహీనతలను ఆసరాగా చేసుకుని,మోసగాళ్లు సమాజపు మూలాలను కుదిపేస్తున్నారు.హనీ ట్రాప్ అంటే కేవలం ఒక వ్యక్తిని మోసం చేయడం కాదు.అది ఒక కుటుంబాన్ని కూల్చడం,ఒక వ్యక్తి జీవితాన్ని శిథిలం చేయడం,సమాజంలో నమ్మకాన్ని చంపడం.సోషల్ మీడియాలో ఏర్పడే నకిలీ సంబంధాలు,వీడియో కాల్స్ ద్వారా బ్లాక్‌మెయిల్,ప్రైవేట్ క్షణాల దుర్వినియోగం-ఇవన్నీ నేటి హనీ ట్రాప్ మోసాల రూపాలు.అత్యంత ఆందోళన కలిగించే విషయం ఏమిటంటే,ఈ ఉచ్చులో చిక్కుతున్నవారిలో కేవలం అమాయకులే కాదు-చదువుకున్నవారు,ఉన్నతాధికారులు,ప్రజాప్రతినిధులు కూడా ఉన్నారు.ఇది హనీ ట్రాప్ ప్రమాదం ఎంత లోతుగా సమాజంలోకి చొచ్చుకుపోయిందో సూచిస్తోంది.“నాకు జరగదు”అన్న నిర్లక్ష్య ధోరణే వీరిని బలితీసుకుంటోంది.బాధితులు ఎదుర్కొనే నష్టం కేవలం ఆర్థికం మాత్రమే కాదు.పరువు పోవడమే వారిని లోపల నుంచి కుంగదీస్తుంది.కుటుంబ విభేదాలు,ఉద్యోగ సమస్యలు,మానసిక ఒత్తిడి,కొన్నిసార్లు ఆత్మహత్య ఆలోచనల దాకా పరిస్థితులు వెళ్తున్నాయి.కానీ సమాజం వీరిని బాధితులుగా కాకుండా తప్పు చేసినవారిగా చూడటం వల్లే,చాలామంది బయటకు రాకుండా మౌనంగా బాధపడుతున్నారు.ఈ మౌనమే మోసగాళ్లకు పెద్ద ఆయుధంగా మారుతోంది.ఈ పరిస్థితిలో ప్రభుత్వాల బాధ్యత మరింత పెరుగుతోంది.సైబర్ నేరాలపై కఠిన చట్టాలు రూపొందించడం మాత్రమే సరిపోదు-అవి వేగంగా,సమర్థవంతంగా అమలయ్యేలా చూడాలి.హనీ ట్రాప్‌ను ప్రత్యేక నేరంగా గుర్తించి,ఫాస్ట్ ట్రాక్ కోర్టుల ద్వారా త్వరిత తీర్పులు ఇవ్వాల్సిన అవసరం ఉంది.అంతేకాదు,ప్రతి జిల్లాలో సైబర్ క్రైమ్ విభాగాలను బలోపేతం చేయడం,ఆధునిక సాంకేతికతతో శిక్షణ పొందిన సిబ్బందిని నియమించడం అనివార్యం.సోషల్ మీడియా సంస్థల పాత్రను కూడా విస్మరించలేం.ఫేక్ అకౌంట్లను గుర్తించి తొలగించే బాధ్యతను వారికి స్పష్టంగా అప్పగించాలి.డేటా భద్రత,గోప్యత విషయంలో కఠిన నియంత్రణలు అమలు చేయాల్సిన అవసరం ఉంది.కేవలం లాభాల కోసం కాకుండా,వినియోగదారుల భద్రత కోసం కూడా వారు బాధ్యత వహించాల్సిన సమయం ఆసన్నమైంది.అంతేకాదు,ప్రజల్లో అవగాహన కల్పించడమే అత్యంత ప్రభావవంతమైన ఆయుధం.పాఠశాలలు,కళాశాలల్లో సైబర్ భద్రతపై పాఠాలు ప్రవేశపెట్టాలి.గ్రామస్థాయి నుంచి పట్టణ స్థాయి వరకు అవగాహన కార్యక్రమాలు నిర్వహించాలి.“జాగ్రత్తే భద్రత”అన్న భావనను ప్రజల్లో నాటాలి.మరొక ముఖ్యమైన అంశం-బాధితుల పట్ల మన దృక్పథం మారాలి.పరువు పోతుందన్న భయంతో పోలీసులను ఆశ్రయించని వారు అనేకమంది.గోప్యతకు పూర్తి భరోసా కల్పిస్తూ,ఉచిత లీగల్ ఎయిడ్,మానసిక సలహా సేవలు అందించడం ద్వారా బాధితులకు ధైర్యం ఇవ్వాల్సిన బాధ్యత ప్రభుత్వాలదే.చివరికి చెప్పాల్సిందేమిటంటే-హనీ ట్రాప్ కేవలం ఒక సైబర్ నేరం కాదు,ఇది సామాజిక సమస్య.దీనిని ఎదుర్కోవాలంటే కేవలం చట్టాలు సరిపోవు,కేవలం వ్యక్తిగత జాగ్రత్తలూ సరిపోవు.ప్రజల అప్రమత్తత,ప్రభుత్వాల కఠిన చర్యలు,సమాజపు సహకారం-ఈ మూడు కలిసినప్పుడే ఈ డిజిటల్ ఉచ్చుకు నిజమైన ముగింపు పలకగలం.డిజిటల్ యుగంలో భద్రత అనేది హక్కు కాదు-బాధ్యత కూడా.ఆ బాధ్యతను ప్రతి ఒక్కరం గుర్తించాల్సిన సమయం వచ్చింది