రేబీస్‌ రహిత ప్రపంచం – మనందరి బాధ్యత

ఉమ్మడి వరంగల్ జిల్లా ఉత్తమ ఉపాధ్యాయ అవార్డు గ్రహీత భౌతిక శాస్త్ర ఉపాధ్యాయుడు తంగళ్ళపల్లి కుమారస్వామి

ఈ69న్యూస్ జయశంకర్ భూపాలపల్లి రేగొండ

ప్రతి ఒక్కరూ గ్రామాలలో పట్టణాలలో రెబిస్ రహిత నిర్మూలనలకు కృషి తో తమ బాధ్యతగా పాటుపడి రెబిస్ వ్యాధి రహిత ప్రపంచంగా నెలకొంటుందని ఉమ్మడి వరంగల్ జిల్లా ఉత్తమ ఉపాధ్యాయ అవార్డు గ్రహీత భౌతిక శాస్త్ర ఉపాధ్యాయులు తంగళ్ళపల్లి కుమారస్వామి పేర్కొన్నారు.సెప్టెంబర్ 28న ప్రపంచ రేబీస్‌ దినోత్సవాన్ని గుర్తు చేసుకుంటు కుమారస్వామి ఒక వ్యాసంలో ప్రజలకు సూచించారు. సెప్టెంబర్ 28 రెబిస్ దినోత్సవం గా గుర్తు చేసుకుంటూ.. కుక్క కాటు వ్యాధిగా పిలిచే రేబీస్‌ వాస్తవానికి ఒక ప్రాణాంతక వైరస్. లక్షణాలు కనిపించిన తర్వాత చికిత్స దాదాపు అసాధ్యం. అయినా, ఈ వ్యాధిని 100 శాతం నివారించవచ్చు. ఇది మన సమాజం మొత్తం కలసి తీసుకోవాల్సిన ఒక సామూహిక సవాలు.
రేబీస్ ప్రధానంగా కుక్కలు, పిల్లులు, కోతులు వంటి జంతువుల లాలాజలం ద్వారా వ్యాపిస్తుంది. గ్రామీణ ప్రాంతాలలో అవగాహన లోపం, వీధి కుక్కల పెరుగుదల, సమయానికి టీకాలు వేయించకపోవడం వల్ల ప్రమాదం ఎక్కువవుతోంది. ప్రపంచ ఆరోగ్య సంస్థ గణాంకాల ప్రకారం, ప్రతి సంవత్సరం లక్షలాది మంది ఈ వ్యాధి కారణంగా ప్రాణాలు కోల్పోతున్నారు.
ఈ పరిస్థితిని మార్చగల మార్గం మన చేతుల్లోనే ఉంది. పెంపుడు జంతువులకు ప్రతి సంవత్సరం రేబీస్‌ టీకా తప్పనిసరిగా వేయించాలి. కుక్క కాటుకు గురైన వెంటనే గాయాన్ని సబ్బుతో 15 నిమిషాలు కడిగి, సమీప ఆరోగ్య కేంద్రంలో రేబీస్ వ్యాక్సిన్ తీసుకోవాలి. ఈ ప్రాథమిక జాగ్రత్తలు అనేక ప్రాణాలను రక్షిస్తాయి. ప్రభుత్వం మరియు స్థానిక సంస్థలు ఉచిత టీకా శిబిరాలు, అవగాహన కార్యక్రమాలు మరింత విస్తృతంగా నిర్వహించాలి. పౌరసమాజం, విద్యాసంస్థలు, స్వచ్ఛంద సంస్థలు కూడా అవగాహన కల్పించడంలో కీలకపాత్ర పోషించాలి.రేబీస్‌ రహిత తెలంగాణ, రేబీస్‌ రహిత భారత్‌—ఇది సాధ్యమే. కానీ ప్రతీ పౌరుడు తన బాధ్యతను గుర్తించి, జాగ్రత్తలు తీసుకుంటేనే అది సాకారం అవుతుంది. రేబీస్‌ వ్యాధి మరణదాయకం అయినా, నివారణ సాధ్యం. అవగాహనే ఆయుధంలా మన వంతు బాధ్యతగా ప్రతి గ్రామంలో అవగాహన కల్పించాలని అవార్డు గ్రహీత కుమారస్వామి పిలుపునిచ్చారు.