వాహనం కదిలితే బురదలో కూరుకుపోతుంది! — మారుమూల ఏజెన్సీ గ్రామాల దుస్థితి
“రోడ్డు వేస్తేనే ఊరు ముందుకు.. లేకుంటే అభివృద్ధి మాటలకే పరిమితం!” — ఎలిశెట్టిపల్లి ప్రజల ఆవేదన
“అధికారుల కళ్లకు కనిపించని రహదారి కష్టాలు.. ప్రభుత్వమే స్పందించాలి!” — ఎలిశెట్టిపల్లి గ్రామస్తుల డిమాండ్
E69 న్యూస్, ఏటూరునాగారం సెప్టెంబర్ 22:
ములుగు జిల్లా ఏటూరునాగారం మండలంలోని మారుమూల ఏజెన్సీ ప్రాంతమైన ఎలిశెట్టిపల్లి–ఎలిశెట్టిపల్లి కొత్తూరు గ్రామాల మధ్య రహదారి దుస్థితి ప్రజలను తీవ్ర ఇబ్బందులకు గురిచేస్తోంది. ఇటీవల కురుస్తున్న వర్షాలకు రహదారి మొత్తం బురదమయంగా మారి, రాకపోకలకు పూర్తిగా ఇబ్బందికరంగా తయారైంది. రహదారిపై భారీగా బురద పేరుకుపోవడంతో ట్రాక్టర్లు, ద్విచక్ర వాహనాలు, ఇతర వాహనాలు ముందుకు వెళ్లలేని పరిస్థితి నెలకొంది. వ్యవసాయ పనుల కోసం పొలాలకు వెళ్లే రైతులు, నిత్యావసరాల కోసం మండల కేంద్రానికి వెళ్లే గ్రామస్తులు, విద్యార్థులు, వృద్ధులు, మహిళలు ఈ రహదారి దుస్థితితో తీవ్ర అవస్థలు పడుతున్నారు. వర్షం పడిన ప్రతిసారి రహదారి పరిస్థితి మరింత అధ్వానంగా మారుతుండటంతో అత్యవసర సమయంలో వైద్య సేవలు పొందేందుకు కూడా ప్రజలు ఇబ్బందులు ఎదుర్కొనే పరిస్థితి ఉందని స్థానికులు ఆవేదన వ్యక్తం చేస్తున్నారు. రహదారి సరిగా లేకపోవడంతో వాహనదారులు బురదలో వాహనాలను నడపాల్సి వస్తోంది. కొన్ని సందర్భాల్లో వాహనాలు రహదారిలోనే ఇరుక్కుపోవడంతో వాటిని బయటకు తీసేందుకు స్థానికులు తీవ్రంగా శ్రమించాల్సి వస్తోంది. ఏజెన్సీ ప్రాంతాల్లో ప్రజలకు కనీస రహదారి సౌకర్యం కల్పించడం ప్రభుత్వ బాధ్యత అయినప్పటికీ, ఎలిశెట్టిపల్లి–ఎలిశెట్టిపల్లి కొత్తూరు మధ్య మార్గం పరిస్థితి మాత్రం అందుకు భిన్నంగా కనిపిస్తోంది.
అధికారులు ఇకనైనా కదలాలి..
ఎలిశెట్టిపల్లి, ఎలిశెట్టిపల్లి కొత్తూరు గ్రామాల ప్రజల రాకపోకలకు కీలకమైన ఈ మార్గాన్ని సంబంధిత అధికారులు వెంటనే క్షేత్రస్థాయిలో పరిశీలించాలని గ్రామస్తులు కోరుతున్నారు. తక్షణ ఉపశమనంగా రహదారిపై మొరం, కంకర వేసి రాకపోకలకు అనుకూలంగా మార్చడంతో పాటు, శాశ్వత పరిష్కారంగా నాణ్యమైన రహదారి నిర్మాణానికి చర్యలు చేపట్టాలని డిమాండ్ చేస్తున్నారు.“ఎన్నికలు వచ్చినప్పుడు గ్రామాలకు వస్తారు.. సమస్యలు వచ్చినప్పుడు మాత్రం అధికారులు కనిపించరు” అనే భావన ప్రజల్లో కలగకుండా ప్రభుత్వం వెంటనే స్పందించాలని స్థానికులు కోరుతున్నారు. మారుమూల ఏజెన్సీ గ్రామాలకు కూడా సమానంగా మౌలిక సదుపాయాలు అందేలా సంబంధిత శాఖలు సమన్వయంతో చర్యలు తీసుకోవాలని విజ్ఞప్తి చేస్తున్నారు. ఎలిశెట్టిపల్లి–ఎలిశెట్టిపల్లి కొత్తూరు రహదారి సమస్యపై జిల్లా అధికారులు, ఐటీడీఏ అధికారులు, పంచాయతీరాజ్ శాఖ తక్షణమే దృష్టి సారించి రహదారి పనులకు చర్యలు ప్రారంభించాలని గ్రామస్తులు డిమాండ్ చేస్తున్నారు. ప్రభుత్వం వెంటనే స్పందించి నిధులు కేటాయించి శాశ్వత రహదారి నిర్మాణం చేపట్టాలని, అప్పటివరకు ప్రజలకు ఇబ్బందులు లేకుండా తాత్కాలిక మరమ్మతులు చేపట్టాలని కోరుతున్నారు.
About The Author
