విద్యార్థులు క్రమశిక్షణతో చదివి ఉన్నత స్థాయికి చేరాలి
భూపాలపల్లి జిల్లా కేంద్రంలోని గిరిజన బాలికల ఆశ్రమ ఉన్నత పాఠశాలను జిల్లా కలెక్టర్ రాహుల్ శర్మ గురువారం ఆకస్మికంగా తనిఖీ చేసి, విద్యా ప్రమాణాలు, పోషకాహారం అమలు, విద్యార్థుల ఆరోగ్యం, భద్రతా ఏర్పాట్లపై సమగ్రంగా పరిశీలించారు. ఈ సందర్భంగా విద్యార్థులు క్రమశిక్షణతో చదువుకుని జీవితంలో ఉన్నత స్థానాలను అధిరోహించాలని ఆయన సూచించారు.పాఠశాలలో అమలవుతున్న మధ్యాహ్న భోజన పథకాన్ని కలెక్టర్ సమగ్రంగా పరిశీలించారు.వంటగది పరిశుభ్రత, వంట సిబ్బంది పని విధానం, ఆహార పదార్థాల నిల్వ, మెనూ ప్రకారం భోజనం అందిస్తున్నారా లేదా వంటి అంశాలను వివరంగా పరిశీలించారు. ఆహార పదార్థాలు పరిశుభ్రంగా, నాణ్యతతో ఉన్నాయా అనే విషయాన్ని స్వయంగా తనిఖీ చేసి, విద్యార్థులతో కలిసి మధ్యాహ్న భోజనం చేసి నాణ్యతను అంచనా వేశారు. భోజనం రుచిగా ఉందని పేర్కొంటూ, ప్రతి రోజు ఇదే ప్రమాణం కొనసాగించాలని వంట సిబ్బందిని అభినందించారు.ఈ సందర్భంగా కలెక్టర్ మాట్లాడుతూ విద్యార్థుల ఆరోగ్యం పట్ల ప్రత్యేక శ్రద్ధ వహించాలని,సమయానుకూలంగా ఆరోగ్య పరీక్షలు నిర్వహించాలని సంబంధిత అధికారులను ఆదేశించారు.పోషకాహారం విషయంలో ఎలాంటి నిర్లక్ష్యం సహించబోమని స్పష్టం చేశారు. వంట సిబ్బంది వ్యక్తిగత పరిశుభ్రత పాటించడంతో పాటు, వంటగది పరిశుభ్రంగా ఉండేలా చూడాలని, ఆహార పదార్థాలు తాజావిగా ఉండేలా క్రమం తప్పకుండా తనిఖీలు నిర్వహించాలని సూచించారు. గడువు ముగిసిన లేదా నాణ్యతలేని పదార్థాలను వినియోగించరాదని హెచ్చరించారు.విద్యతో పాటు ఆరోగ్యం కూడా సమానంగా ముఖ్యమని పేర్కొన్న ఆయన, విద్యార్థులు సమతుల ఆహారం తీసుకోవడంతో పాటు క్రీడల్లోనూ చురుకుగా పాల్గొనాలని సూచించారు. క్రమశిక్షణ, శ్రమ, మంచి అలవాట్లు విద్యార్థుల భవిష్యత్తును తీర్చిదిద్దుతాయని తెలిపారు. ఉపాధ్యాయులు విద్యార్థుల వ్యక్తిత్వ వికాసంపై దృష్టి సారించి, చదువుతో పాటు నైతిక విలువలు పెంపొందేలా మార్గనిర్దేశం చేయాలని సూచించారు.తరువాత హాస్టల్ పరిసరాలను పరిశీలించిన కలెక్టర్,విద్యార్థుల భద్రతకు అత్యంత ప్రాధాన్యం ఇవ్వాలని పేర్కొన్నారు. సీసీ కెమెరాల ఏర్పాటు, ప్రహరీ గోడపై ఫెన్సింగ్ ఏర్పాటు, హాస్టల్ పరిశుభ్రత, తాగునీటి సౌకర్యాలు వంటి అంశాలను మెరుగుపరచాలని అధికారులకు సూచించారు. విద్యార్థులు సురక్షిత వాతావరణంలో చదువుకునేలా అవసరమైన అన్ని చర్యలు తీసుకోవాలని ఆదేశించారు.ఈ తనిఖీ కార్యక్రమంలో తహసీల్దార్ శ్రీనివాసులు, పాఠశాల ప్రిన్సిపాల్ జీవరత్నం, ఉపాధ్యాయులు, సిబ్బంది మరియు సంబంధిత అధికారులు పాల్గొన్నారు. జిల్లా పరిపాలన విద్యా సంస్థల అభివృద్ధి, విద్యార్థుల ఆరోగ్యం మరియు సంక్షేమంపై ప్రత్యేక దృష్టి సారిస్తోందని కలెక్టర్ తెలిపారు.
About the Author
