నిరుపేద క్రీడాకారునికి చేయూత
గ్రామీణ ప్రాంతాల నుంచి వెలుగులోకి వస్తున్న ప్రతిభను ప్రోత్సహించాలనే లక్ష్యంతో రేగొండ మండలం పెద్దపల్లి గ్రామానికి చెందిన యువ క్రీడాకారుడు పసుల రాజుకు భాగిర్తిపేట గ్రామం సర్పంచ్ పెరుమాండ్ల తిరుపతి గౌడ్ ఆర్థిక సహాయం అందజేశారు. స్వయంకృషితో క్రికెట్లో నైపుణ్యాన్ని పెంపొందించుకొని రాష్ట్ర స్థాయి నుంచి దేశ స్థాయికి ఎదుగుతున్న పసుల రాజు క్రీడా ప్రయాణానికి ప్రోత్సాహంగా రూ.5,000 నగదు అందించి అభినందించారు.ఈ సందర్భంగా సర్పంచ్ మాట్లాడుతూ గ్రామీణ యువతలో అపారమైన ప్రతిభ దాగి ఉందని, సరైన ప్రోత్సాహం, మార్గదర్శనం లభిస్తే వారు ఉన్నత స్థాయికి చేరుకుంటారని పేర్కొన్నారు. ఆర్థిక ఇబ్బందులు ప్రతిభకు అడ్డంకిగా మారకుండా సమాజం ముందుకు వచ్చి చేయూతనివ్వాల్సిన అవసరం ఉందని అన్నారు. క్రీడల ద్వారా వ్యక్తిత్వ వికాసం, క్రమశిక్షణ, ఆరోగ్యవంతమైన జీవనశైలి పెంపొందుతాయని పేర్కొంటూ యువత క్రీడల వైపు మరింతగా దృష్టి సారించాలని పిలుపునిచ్చారు.క్రీడా రంగంలో కష్టపడి సాధన చేస్తున్న పసుల రాజు భవిష్యత్తులో రాష్ట్రానికి, దేశానికి పేరు తీసుకురావాలని ఆశాభావం వ్యక్తం చేశారు. యువ క్రీడాకారులకు స్థానిక సంస్థలు, ప్రజాప్రతినిధులు, సంఘాలు కలిసి మద్దతు ఇస్తే మరిన్ని ప్రతిభలు వెలుగులోకి వస్తాయని తెలిపారు.ఈ కార్యక్రమంలో మైనారిటీ సెల్ అధ్యక్షుడు ఎం.డి. షబ్బీర్, భారతీయ జనతా పార్టీ భాగిర్తిపేట అధ్యక్షుడు దొడ్ల రత్నాకర్, గౌడ సంఘం అధ్యక్షుడు మెరుగు బాపు, ఉపాధ్యక్షుడు ఆకుల శ్రీనివాస్, ఆర్ఎంపి మండల అధ్యక్షుడు సత్తెనపల్లి శ్రీధర్, వార్డ్ సభ్యుడు బాలాజీ రాజు తదితరులు పాల్గొని యువ క్రీడాకారునికి శుభాకాంక్షలు తెలిపారు.
About the Author
