బాధితులతో స్నేహంగా నిందితులతో కఠినంగా ఉండాలి
చిట్యాల పోలీస్ స్టేషన్ పరిధిలో శాంతి భద్రతల పరిరక్షణ, ప్రజలకు నాణ్యమైన సేవలందింపు, పోలీస్ వ్యవస్థపై విశ్వాసం పెంపు లక్ష్యంగా ప్రత్యేక సిబ్బంది సమావేశం నిర్వహించారు.ఈ సమావేశానికి సీఐ మల్లేష్ అధ్యక్షత వహించగా,ఎస్సై శ్రావణ్ కుమార్తో పాటు ఇతర అధికారులు, సిబ్బంది పాల్గొన్నారు. పోలీస్ స్టేషన్కు వచ్చే ప్రజల సమస్యల పరిష్కారంలో బాధ్యతాయుత వైఖరి, విధి నిర్వహణలో క్రమశిక్షణ, అవినీతి రహిత సేవల ప్రాముఖ్యతపై ఆయన సమగ్ర మార్గదర్శకాలు జారీ చేశారు.సీఐ మల్లేష్ మాట్లాడుతూ, పోలీస్ స్టేషన్కు వచ్చే ప్రతి వ్యక్తి న్యాయం కోసం ఆశతో వస్తారని, అందువల్ల బాధితులను గౌరవంతో,సానుభూతితో పలకరించి వారి సమస్యలను ఓర్పుతో వినాలని సూచించారు. బాధితులకు భరోసా కల్పిస్తూ చట్టబద్ధంగా తక్షణ చర్యలు తీసుకోవడం ద్వారా ప్రజల్లో పోలీస్ శాఖపై నమ్మకం పెరుగుతుందని ఆయన పేర్కొన్నారు.అదే సమయంలో నేరాలకు పాల్పడిన నిందితుల పట్ల మాత్రం ఎటువంటి రాజీ లేకుండా కఠినంగా వ్యవహరించి చట్టం ముందు సమానత్వాన్ని కాపాడాలని స్పష్టం చేశారు.విధి నిర్వహణలో పోలీస్ సిబ్బంది అనుసరించాల్సిన ముఖ్యాంశాలను ఆయన వివరించారు.డ్యూటీకి హాజరయ్యే ప్రతి సిబ్బంది సమయపాలన పాటిస్తూ క్రమశిక్షణతో వ్యవహరించాలి. ఫీల్డ్ డ్యూటీలకు వెళ్లేటప్పుడు అవసరమైన సామగ్రి, ముఖ్యంగా లాఠీలు వెంట తీసుకెళ్లాలని సూచించారు.ప్రజలతో మర్యాదపూర్వకంగా మాట్లాడటం, ఫిర్యాదులను ఆలస్యం లేకుండా నమోదు చేయడం, కేసుల దర్యాప్తును వేగవంతం చేయడం వంటి అంశాలు సేవా ప్రమాణాలను పెంచుతాయని ఆయన తెలిపారు.అవినీతి రహిత సేవలపై ప్రత్యేకంగా దృష్టి సారించిన సీఐ, విధి నిర్వహణలో ఎక్కడా లాలూచీకి తావు ఇవ్వకుండా పారదర్శకంగా పని చేయాలని హెచ్చరించారు.నిజాయితీ, నిబద్ధతతో పని చేస్తే పోలీస్ శాఖ ప్రతిష్ట మరింత పెరుగుతుందని పేర్కొన్నారు. ప్రజలతో పోలీస్ అనుబంధం బలపడేలా ప్రవర్తన ఉండాలని, ప్రతి పోలీస్ అధికారి ప్రజలకు అందుబాటులో ఉండాలని సూచించారు.సమావేశంలో స్టేషన్ పరిధిలో శాంతి భద్రతల పర్యవేక్షణను మరింత బలోపేతం చేయడం, ఫిర్యాదుల పరిష్కారంలో ఆలస్యం నివారించడం, సున్నిత ప్రాంతాలపై ప్రత్యేక నిఘా ఏర్పాటు వంటి అంశాలపై చర్చించారు. ప్రజల భద్రతే పోలీసుల ప్రధాన బాధ్యత అని గుర్తుచేసిన సీఐ, విధి నిర్వహణలో సేవా దృక్పథం, నిష్పాక్షికత, కఠిన చట్ట అమలు అనే మూడు సూత్రాలను సిబ్బంది కచ్చితంగా పాటించాలని ఆదేశించారు.ఈ సమావేశంలో చిట్యాల మూడవ ఎస్సై ఈశ్వరయ్యతో పాటు పోలీస్ స్టేషన్ సిబ్బంది పాల్గొన్నారు.సమావేశం ద్వారా సిబ్బందిలో సేవాభావం, క్రమశిక్షణ, ప్రజా అనుబంధంపై మరింత అవగాహన పెరిగిందని అధికారులు తెలిపారు.
About the Author
