మహిళా సంక్షేమానికి పెద్ద పీట వేస్తున్న సీఎం

మహిళా సంక్షేమానికి పెద్ద పీట వేస్తూ….మహిళల ఆత్మగౌరవాన్ని నిలిపేలా రాష్ట్ర ప్రభుత్వం ఇందిరమ్మ చీరల పంపిణీ నిర్వహిస్తోందని వరంగల్ పార్లమెంట్ సభ్యురాలు డాక్టర్ కడియం కావ్య గారు, మాజీ ఉప ముఖ్యమంత్రి స్టేషన్ ఘనపూర్ ఎమ్మెల్యే కడియం శ్రీహరి గారు అన్నారు.

స్టేషన్ ఘనపూర్ పట్టణ కేంద్రంలోని ఎస్ కన్వెన్షన్ లో నిర్వహించిన స్టేషన్ ఘనపూర్ నియోజకవర్గ పరిధిలోని 5మండలాలు లింగాల ఘనపూర్, రఘునాథపల్లి, స్టేషన్ ఘనపూర్, జఫర్ గడ్, చిల్పూర్ మండలాల మహిళలకు ఇందిరా మహిళా శక్తి చీరల పంపిణి కార్యక్రమానికి వరంగల్ ఎంపీ డాక్టర్ కడియం కావ్య గారు, ఎమ్మెల్యే కడియం శ్రీహరి గారు, జిల్లా కలెక్టర్ షేక్ రిజ్వాన్ భాషా గారు ముఖ్య అతిథులుగా పాల్గొన్నారు.
మహిళల అభ్యున్నతికి తమ ప్రభుత్వం ప్రాధాన్యత ఇస్తోందన్నారు. కోటి మంది మహిళలకు కోటీశ్వరులను చేయాలనే సంకల్పంతో అనేక కార్యక్రమాలు నిర్వహిస్తున్నామన్నారు. సోలార్ ప్లాంట్లు, పెట్రోల్ పంపులు మరియు ఆగ్రో రంగాలలో మహిళలు ముఖ్యమైన పాత్ర పోషిస్తున్నారని పేర్కొన్నారు.

ఈ సందర్బంగా ఎమ్మెల్యే కడియం శ్రీహరి గారు మాట్లాడుతూ…. ఎలాంటి కుల మత తారతమ్యం లేకుండా 18ఏళ్ళు నిండిన ప్రతీ మహిళకు చీరలు అందించాలని అన్నారు. రాష్ట్రంలో కోటి మంది మహిళలకు ముఖ్యమంత్రి రేవంత్ రెడ్డి గారు చీరలు అందిస్తున్నారని తెలిపారు. మహిళా సాధికారాతకు, మహిళా సంక్షేమానికి సీఎం రేవంత్ రెడ్డి పెద్దపీట వేస్తున్నారని అందులో భాగంగానే ప్రతీ పనిలో, ప్రతీ పథకంలో మహిళలకు ప్రాధాన్యత ఇస్తున్నారని వెల్లడించారు. మహిళలకు ఉచిత బస్సు ప్రయాణం, గృహ అవసరాలకు 200యూనిట్ల ఉచిత విద్యుత్, సన్న బియ్యం పంపిణి, రేషన్ కార్డులు, ఇందిరమ్మ ఇల్లు వంటి పథకాలను మహిళల కోసం అమలు చేస్తున్నారని తెలిపారు. ఇందిరమ్మ ఇళ్ల మంజూరులో, నిర్మాణంలో ఉమ్మడి వరంగల్ జిల్లాలోనే స్టేషన్ ఘనపూర్ నియోజకవర్గం మొదటి స్థానంలో ఉందని అన్నారు. పేదలైన అర్హులందరికీ ఇందిరమ్మ ఇల్లు ఇచ్చే బాధ్యత నాదని హామీ ఇచ్చారు.

జనగామ జిల్లాలో స్టేషన్ నియోజకవర్గ పరిధిలోని 5మండలాలలో 3మండలాల స్వయం సహాయక సంఘాలకు మాత్రమే ఆర్టీసీ బస్సులు వచ్చాయని, మిగతా రెండు మండలాలకు కూడా వెంటనే ఆర్టీసీ బస్సులు వచ్చే విధంగా చూడాలని కలెక్టర్ గారిని కోరారు. జనగామ జిల్లాలో మహిళా సంఘాల సభ్యులకు పాడి పశువులను అందించాలని సూచించారు. ప్రతీ ఎస్ హెచ్ జి లో ఒకరికి రెండు బర్లు లేదా నాలుగు ఆవులు ఇవ్వాలని అలాగే మండలానికి ఒక ఆర్టీసీ బస్సు, పెట్రోల్ బంక్, సోలార్ ప్లాంట్ ఉండే విధంగా చర్యలు తీసుకోవాలని అధికారులకు సూచించారు. వనిత టీ స్టాల్స్ తో పాటు పాల ఉత్పత్తుల విక్రయ కేంద్రాలను కూడా ఏర్పాటు చేయాలని తెలిపారు. ముఖ్యమంత్రి రేవంత్ రెడ్డి గారితో పాటు నాకూ మహిళలు అంటే ప్రత్యేక అభిమానం అని అన్నారు. ఎందుకంటే నాకు 3ఆడపిల్లలు, 6గురు అక్కచెల్లల్లు ఉన్నారని తెలిపారు. పేదరికాన్ని లెక్కచేయకుండా చదువుకున్నాను కాబట్టే ఈ రోజు ఈ స్థాయిలో ఉన్నానని, నేడు రెండు తెలుగు రాష్ట్రాలలో పరిచయం అక్కరలేని పేరు కడియం శ్రీహరి అని పేర్కొన్నారు. మీ అందరి ఆశీర్వాదంతో నియోజకవర్గాన్ని మరింత అభివృద్ధి చేసేందుకు కృషి చేస్తానని వెల్లడించారు.

వరంగల్ ఎంపీ డాక్టర్ కకడియం కావ్య గారు మాట్లాడుతూ…..

గత ప్రభుత్వం ఇచ్చిన చీరలను పొలాల్లో దిష్టి బొమ్మలకు కట్టే వారాన్నారు. మహిళల ఆత్మ గౌరవాన్ని పెంపొందించాలనే ఉద్దేశంతో ప్రభుత్వం ఈసారి నాణ్యమైన చీరలను అందిస్తుందన్నారు. మహిళల సామాజిక–ఆర్థిక శక్తివంతత కోసం ప్రభుత్వం తీసుకొస్తున్న ప్రతి పథకం మహిళల జీవితాల్లో స్థిరమైన మార్పు తీసుకువస్తోందని తెలిపారు. మహిళలు ఆర్థికంగా ఎదిగితే కుటుంబం అభివృద్ధి చెందుతుందని, కుటుంబం అభివృద్ధి చెందితే సమాజం సుసంపన్నమవుతుందని ఎంపీ పేర్కొన్నారు. మహిళలు విద్య, ఉపాధి, వ్యాపార రంగాల్లో ముందుకు రావడానికి ప్రభుత్వం అవసరమైన సదుపాయాలన్నీ అందిస్తున్నదని అన్నారు. మహిళల ఆరోగ్య భద్రత, ఆర్థిక భద్రత, స్వయం ఉపాధి అవకాశాలపై ప్రత్యేక దృష్టితో ఇందిరమ్మ రాజ్యం పనిచేస్తోందని తెలిపారు.

ఈ చీరల పంపిణీ కేవలం ఒక పథకం మాత్రమే కాదు, మహిళల పట్ల ప్రభుత్వ మనసులోని గౌరవానికి ప్రతీక అని ఎంపీ గారు అన్నారు. ప్రతి ఇంటికి వెలుగు చేరేలా, ప్రతి మహిళ ఆత్మవిశ్వాసంతో ముందుకు సాగేందుకు ప్రభుత్వం అండగా నిలుస్తుందని చెప్పారు. మహిళలు ఏ రంగంలోనైనా ముందుకు రావడానికి రాష్ట్ర ప్రభుత్వం తమతో కలిసి నిలుస్తుందని, మహిళల అభివృద్ధి కోసం ఎలాంటి రాజీపడబోమని ఎంపీ హామీ ఇచ్చారు.

ఈ కార్యక్రమంలో మార్కెట్ కమిటీ చైర్మన్ లావణ్య శిరీష్ రెడ్డి, పీఏ సీఎస్ చైర్మన్ కర్ణాకర్ రావు, మార్కెట్ కమిటీ వైస్ చైర్మన్ ఐలయ్య, డిఆర్ డివో, ఆర్డివో, డిపిఎంలు, ఎపిఎంలు, మహిళా సంఘాల జిల్లా, మండలలాల అధ్యక్షులు, వివోలు, వివోఏలు మహిళలు తదితరులు పాల్గొన్నారు.