E69NEWS | Updated on: Jul 19, 2025 | 6:09 AM

ఈ69న్యూస్ జూలై 18,2025

తెలుగు సినీ పరిశ్రమలో విషాదం నెలకొంది.టాలీవుడ్ హాస్య నటుడు ఫిష్ వెంకట్ (అసలు పేరు మంగిలంపల్లి వెంకటేశ్‌) కన్నుమూశారు.54 ఏళ్ల వయస్సులో ఆయన తుదిశ్వాస విడిచారు.

వెంకట్ సినీ ప్రయాణం

ఫిష్ వెంకట్ ఎన్టీఆర్ హీరోగా నటించిన ఆది సినిమాతో వెండితెరకు పరిచయమై,విలన్ పాత్రలతో పాటు అనేక సినిమాల్లో హాస్య పాత్రలు పోషిస్తూ ప్రేక్షకులను మంత్రముగ్ధులను చేశారు.ముఖ్యంగా గబ్బర్ సింగ్ సినిమాలో ఆయన నటనకు మంచి గుర్తింపు లభించింది.పలు స్టార్ హీరోల చిత్రాల్లో కామెడీతో ప్రేక్షకులకు నవ్వులు పంచారు.

ఆరోగ్య సమస్యలు–ఆర్థిక ఇబ్బందులు

గత కొంతకాలంగా ఆయన రెండు కిడ్నీలు దెబ్బతినడంతో డయాలసిస్ మీద జీవించాల్సి వచ్చింది.చికిత్స కోసం కుటుంబ సభ్యులు-భార్య,కుమార్తె-సహాయం కోరారు.చాలా మంది సినీ ప్రముఖులు స్పందించి సాయం చేసినప్పటికీ,ఆరోగ్య పరిస్థితి అధిగమించలేకపోయింది.

కిడ్నీ మార్పిడి కోసం ప్రయత్నాలు

కిడ్నీ మార్పిడి కోసం రూ.50 లక్షల వరకు ఖర్చు అవుతుందన్న సమాచారం నేపథ్యంలో,కొన్ని ప్రముఖులు మాత్రమే స్పందించగా,చాలా మంది స్టార్ హీరోల నుంచి పెద్దగా స్పందన లేకపోయిందన్న విమర్శలు వినిపిస్తున్నాయి.పవన్ కళ్యాణ్ గతంలో రూ.2 లక్షల ఆర్థిక సహాయం చేసినట్టు సమాచారం.

వెంకట్ మృతి–సినీ ఇండస్ట్రీకి తీరని లోటు

హైదరాబాద్‌లోని ఓ ప్రైవేట్ ఆసుపత్రిలో వెంటిలేటర్‌పై చికిత్స పొందుతూ తుదిశ్వాస విడిచారు.ఆయన మృతి పట్ల సినీ ప్రముఖులు,అభిమానులు,సహచరులు సంతాపం తెలియజేస్తున్నారు.ఈయన మరణం సినీ ఇండస్ట్రీకి తీరని లోటుగా నిలిచింది.

ఫిష్ వెంకట్ ఆత్మకు శాంతి చేకూరాలని,వారి కుటుంబానికి మేము (ఈ69న్యూస్)ప్రగాఢ సానుభూతి తెలియజేస్తున్నాము.