కారు అగ్ని ప్రమాదంలో యువ జర్నలిస్టు దుర్గాప్రసాద్ మృతి
హైదరాబాద్ మేడ్చల్ జిల్లా షామీర్పేట సమీపంలోని అవుటర్ రింగ్ రోడ్డుపై సోమవారం వేకువజామున జరిగిన ఘోర కారు అగ్ని ప్రమాదంలో ఈ-69 న్యూస్ ఛానల్ రాష్ట్ర బ్యూరోగా పని చేసిన యువ జర్నలిస్టు,వ్యాపారవేత్త తాళ్లపల్లి దుర్గాప్రసాద్(31)సజీవదహనమై ప్రాణాలు కోల్పోయాడు.హన్మకొండ భీమారం వినాయకుడి గుడి సమీపంలో నివసిస్తున్న దుర్గాప్రసాద్ చేపల చెరువులు,ఇటుక బట్టీల వ్యాపారం కూడా నిర్వహిస్తూ కుటుంబాన్ని ముందుకు నడిపిస్తున్నారు.పని నిమిత్తం హైదరాబాద్ వెళ్లిన ఆయన,తన దగ్గరి బంధువుల ఇంటి వద్ద కారును ఉంచి రైలులో విజయవాడ వెళ్లి,తిరిగి వచ్చి రాత్రి అక్కడే బస చేశాడు.ఉదయం స్వగ్రామానికి బయలుదేరిన దుర్గాప్రసాద్ వాహనం షామీర్పేట వద్దకు చేరుకోగానే ఎకో స్పోర్ట్ కారులో ఒక్కసారిగా మంటలు చెలరేగాయి.మంటలు తీవ్రరూపం దాల్చడంతో కార్ లాక్ అవ్వటం వల్ల బయటికి రాలేక లోపలే చిక్కుకుపోయి ఘటన స్థలంలోనే కాలిపోయి ఉంటాడని పరిశీలకులు,పోలీసులు భావిస్తున్నారు.దుర్గాప్రసాద్ స్వగ్రామం హన్మకొండ జిల్లా హసన్పర్తి మండలం జయగిరి.ఆయన తండ్రి ప్రభాకర్ ఆర్టీసీలో తనిఖీ వాహన చోదకుడిగా పనిచేసి రిటైర్ అయ్యారు.సోదరుడు సురేష్ ఉద్యోగ రీత్యా యూకేలో స్థిరపడ్డాడు.చేతికి అందిన కొడుకుని కోల్పోయిన తల్లిదండ్రులు,కుటుంబ సభ్యులు కన్నీరుమున్నీరవుతున్నారు.ఘటనపై షామీర్పేట పోలీసులు కేసు నమోదు చేసి దర్యాప్తు కొనసాగిస్తున్నారు.ఇదే క్రమంలో దుర్గాప్రసాద్ అంతిమయాత్ర మంగళవారం జయగిరి గ్రామంలో విషాద వాతావరణంలో జరిగింది.ఈ సందర్భంగా ఈ-69 న్యూస్ తెలుగు గళం యాజమాన్యం పాల్గొని కడసారి నివాళులు అర్పించింది.కార్యక్రమానికి ఛానెల్ యాజమాని(సీఈఓ)రాపర్తి భాను ప్రసాద్,స్టేట్ బ్యూరో ఇన్‌చార్జ్ ముహమ్మద్ సలీం,భూపాలపల్లి జిల్లా స్టాఫ్ రిపోర్టర్ కరుణాకర్ రెడ్డి హాజరై పాడె మోసి అంత్యక్రియల్లో పాల్గొన్నారు.కుటుంబ సభ్యులను పరామర్శించిన సీఈఓ భాను ప్రసాద్ మాట్లాడుతూ..“దుర్గాప్రసాద్ మా ఛానల్ అభివృద్ధికి ఎంతో కృషి చేశారు.విధేయత,నిబద్ధతతో పనిచేసిన ఆయన సేవలు ఎప్పటికీ మరిచిపోలేనివి.ఆయన చూపిన పనితీరు ఎల్లప్పుడూ మా హృదయాల్లో నిలిచిపోతుంది”అని భావోద్వేగంతో తెలిపారు.సహచరుల కన్నీటి వీడ్కోలు,బంధు మిత్రుల ప్రేమాభిమానాల మధ్య దుర్గాప్రసాద్ అంతిమ యాత్ర సాగింది.
About the Author
