రైతులను ఇబ్బంది పెడితే ఊరుకోం
తెలంగాణ రాష్ట్ర ప్రభుత్వం ధాన్యం, మొక్కజొన్న కొనుగోలు కేంద్రాల్లో నెలకొన్న తీవ్ర జాప్యాన్ని నివారించాలని, మౌలిక వసతుల లేమిని అధిగమించి యుద్ధప్రాతిపదికన కొనుగోళ్లు చేపట్టాలని డిమాండ్ చేస్తూ భారతీయ జనతా పార్టీ (బీజేపీ) రేగొండ మండల శాఖ ఆధ్వర్యంలో గురువారం స్థానిక తహశీల్దార్కు (ఎమ్మార్వో) వినతి పత్రం సమర్పించారు. బీజేపీ రేగొండ మండల అధ్యక్షులు బండి శ్రీనివాస్ నేతృత్వంలో జరిగిన ఈ కార్యక్రమానికి పార్టీ మాజీ రాష్ట్ర కార్యవర్గ సభ్యులు వెన్నంపల్లి పాపయ్య, కిసాన్ మోర్చా జిల్లా అధ్యక్షులు పోల్సాని తిరుపతిరావు ముఖ్య అతిథులుగా హాజరయ్యారు.ఈ సందర్భంగా వెన్నంపల్లి పాపయ్య మాట్లాడుతూ, ఆరుగాలం చెమటోడ్చి కంటికి రెప్పలా కాపాడుకుంటూ పంట పండించిన రైతన్న పరిస్థితి రోజురోజుకు దయనీయంగా మారుతోందని ఆవేదన వ్యక్తం చేశారు. తాము పండించిన పంటను అమ్ముకోవడానికి కొనుగోలు కేంద్రాల చుట్టూ వారాల తరబడి తిరుగుతూ అన్నదాతలు నరకయాతన అనుభవిస్తున్నారని పేర్కొన్నారు.ప్రస్తుత కాంగ్రెస్ ప్రభుత్వ నిర్లక్ష్యం, ముందస్తు ప్రణాళిక లోపం కారణంగానే అన్నదాతలు రోడ్లపై కూర్చునే పరిస్థితి నెలకొందని ఆయన విమర్శించారు. కొనుగోలు కేంద్రాల్లో తక్షణమే తూకం యంత్రాలను (కాంటాలను), గూనె సంచులను (గన్ని బ్యాగులను), హమాలీలను, లారీలను పూర్తిస్థాయిలో అందుబాటులోకి తెచ్చి ప్రతి గింజను వెంటనే కొనుగోలు చేయాలని డిమాండ్ చేశారు. తరుగు, తేమ, తాలు పేరుతో రైతులను ఇబ్బంది పెట్టే దళారులపై, కొనుగోలు ప్రక్రియలో అవకతవకలకు పాల్పడుతున్న అధికారులపై రాష్ట్ర ప్రభుత్వం కఠిన చట్టపరమైన చర్యలు తీసుకోవాలని స్పష్టం చేశారు. కొనుగోలు కేంద్రాలకు ధాన్యం వచ్చి నెల రోజులు గడుస్తున్నా సేకరించకపోవడం దురదృష్టకరమని, ఇప్పటికైనా ప్రభుత్వం స్పందించి రైతులకు న్యాయం చేయాలన్నారు. ఈ కార్యక్రమంలో బీజేపీ జిల్లా నాయకులు మెతుకుపల్లి బుచ్చిరెడ్డి, గన్రెడ్డి లింగారెడ్డి, వెంకట్రెడ్డి, బీజేవైఎం జిల్లా నాయకుడు,కనిపర్తి ఉపసర్పంచ్ గుర్రం రమేష్, కౌడగానే రాకేష్, ఎస్టీ మోర్చా నాయకుడు బానోతు రాజేందర్, వివిధ గ్రామాల బూత్ అధ్యక్షులు పొన్నగంటి శ్రీను,పగడాల మనోహర్, గువ్వ సురేష్, పున్నం రఘు తదితరులు పాల్గొన్నారు.
About the Author
