కాళేశ్వర తీరాన పుష్కర వైభవం
దక్షిణాది రాష్ట్రాల్లోనే అత్యంత పవిత్రమైన పుణ్యక్షేత్రంగా,త్రివేణి సంగమ తీరంగా విరాజిల్లుతున్న కాళేశ్వరం వేద మంత్రోచ్ఛారణలతో మారుమ్రోగింది.అంతర్వాహినిగా ప్రవహిస్తున్న చదువుల తల్లి సరస్వతీ నది అంత్య పుష్కర మహోత్సవాలు గురువారం ఉదయం అత్యంత వైభవంగా,ఆధ్యాత్మిక వాతావరణంలో ప్రారంభమయ్యాయి.ఇప్పటివరకు కేవలం సాంప్రదాయాలకే పరిమితమైన సరస్వతీ అంత్య పుష్కరాలను ఈసారి తెలంగాణ రాష్ట్ర ప్రభుత్వం అధికారికంగా,అత్యంత ప్రతిష్టాత్మకంగా నిర్వహిస్తోంది. ఇందుకోసం రూ.30.63 కోట్ల నిధులను కేటాయించి,సర్వాంగ సుందరంగా క్షేత్రాన్ని తీర్చిదిద్దింది.
వేదోక్తంగా అంకురార్పణ – కంచి పీఠాధిపతి తొలి పుణ్యస్నానం:
గోదావరి, ప్రాణహిత నదులు కలిసే ఈ పవిత్ర సంగమ క్షేత్రంలో సరస్వతీ నది అంతర్వాహినిగా ప్రవహించే ప్రాంతంలో (గోదావరి పుష్కరాల వీఐపీ ఘాట్) గురువారం వేకువజామునే పుష్కరుడిని ఆహ్వానించే కార్యక్రమాన్ని శాస్త్రోక్తంగా నిర్వహించారు.శుభ ముహూర్తమైన ఉదయం 5 గంటల 43 నిమిషాలకు వేద పండితులు ప్రథమ పూజ్యుడైన విఘ్నేశ్వరునికి గణపతి పూజలు నిర్వహించి,అంత్య పుష్కర వేడుకలకు ఘనంగా అంకురార్పణ చేశారు.ఈ అరుదైన ఘట్టంలో కంచి కామకోటి పీఠాధిపతి జగద్గురు శ్రీ శంకర విజయేంద్ర సరస్వతీ మహాస్వామి వారు త్రివేణి సంగమ పవిత్ర జలాల్లో తొలి పుష్కర స్నానాన్ని ఆచరించి,పుష్కరాలను లాంఛనంగా ప్రారంభించారు.ఈ సందర్భంగా వేద పండితుల మంత్రోచ్ఛారణల మధ్య ఆయన సరస్వతీ నదికి ప్రత్యేక పూజలు మరియు హారతి కార్యక్రమాలు నిర్వహించారు.అనంతరం కంచి శ్రీచరణులు క్షేత్రంలోని శ్రీ కాళేశ్వర ముక్తేశ్వర స్వామిని, శ్రీ శుభానంద దేవి అమ్మవారిని, శ్రీ జ్ఞాన సరస్వతీ మాతను దర్శించుకుని ప్రత్యేక అర్చనలు చేశారు.
తరలివచ్చిన ప్రముఖులు – మంత్రుల పుణ్యస్నానాలు
ఈ చారిత్రక ప్రారంభోత్సవ వేడుకలో రాష్ట్ర ఐటీ, పరిశ్రమల శాఖ మంత్రి దుద్దిళ్ళ శ్రీధర్ బాబు తన సతీమణి, దేవాదాయ శాఖ ప్రధాన కార్యదర్శి శైలజా రామయ్యర్లతో కలిసి పాల్గొన్నారు.అలాగే రాష్ట్ర దేవాదాయ శాఖ మంత్రి కొండా సురేఖ, దేవాదాయ శాఖ కమిషనర్ హనుమంతరావు,ధార్మిక సలహాదారు గోవింద హరి, ట్రేడింగ్ కార్పోరేషన్ ఛైర్మన్ ఐత ప్రకాష్ రెడ్డి, భూపాలపల్లి శాసనసభ్యులు గండ్ర సత్యనారాయణ రావు,రంగారెడ్డి శాసనసభ్యులు మల్ రెడ్డి రంగారెడ్డి, జిల్లా కలెక్టర్ రాహుల్ శర్మ తదితరులు పవిత్ర సంగమ ఘాట్ వద్ద పుష్కర స్నానాలు ఆచరించి, మొక్కులు చెల్లించుకున్నారు.ఈ సందర్భంగా మంత్రి దుద్దిళ్ల శ్రీధర్ బాబు మాట్లాడుతూ, ముఖ్యమంత్రి ఆదేశాల మేరకు జిల్లా కలెక్టర్,ఎస్పీ నేతృత్వంలోని అధికార యంత్రాంగం రాత్రింబగళ్లు శ్రమించి భక్తులకు అద్భుతమైన ఏర్పాట్లు చేసిందని ప్రశంసించారు.దేశ,రాష్ట్ర నలుమూలల నుండి భక్తులు భారీగా విచ్చేసి పుష్కర స్నానాలు ఆచరించాలని, చదువుల తల్లి దీవెనలు పొందాలని ఆయన ఆకాంక్షించారు.
గవర్నర్ దంపతులకు ఘన స్వాగతం
పుష్కరాల తొలిరోజే రాష్ట్ర గవర్నర్ శివ ప్రతాప్ శుక్లా తన సతీమణితో కలిసి కాళేశ్వరం క్షేత్రానికి చేరుకున్నారు.వారికి రాష్ట్ర మంత్రి దుద్దిళ్ల శ్రీధర్ బాబు, జిల్లా కలెక్టర్ రాహుల్ శర్మ, జిల్లా రక్షకభటకారిణి (ఎస్పీ) సంకీర్త్ ఘనంగా స్వాగతం పలికారు.అనంతరం గవర్నర్ దంపతులు కంచి పీఠాధిపతి శ్రీ శంకర విజయేంద్ర సరస్వతీ స్వామి వారిని దర్శించుకుని,ఆశీస్సులు తీసుకున్నారు. అనంతరం సాయంత్రం వేళ గవర్నర్ దంపతులు పవిత్ర నదీ తీరంలో పుష్కర స్నానం ఆచరించనున్నారు.ఈ 12 రోజుల పాటు ప్రతిరోజూ దేశంలోని వివిధ ప్రముఖ పీఠాల స్వామీజీలు ఇక్కడ పుణ్యస్నానాలు చేయనున్నారు.
భక్తుల కోసం పకడ్బందీ ఏర్పాట్లు-ఎండల నుండి ఉపశమనం
పుష్కరాలు ప్రారంభం కావడంతో తెల్లవారుజాము నుంచే భక్తులు త్రివేణి సంగమ తీరానికి వేలాదిగా తరలివస్తున్నారు. రాబోయే రోజుల్లో సుమారు 30 నుండి 40 లక్షల మంది భక్తులు వచ్చే అవకాశం ఉందని అంచనా వేస్తున్నారు.ప్రస్తుత తీవ్రమైన ఎండలను దృష్టిలో ఉంచుకుని భక్తులకు చల్లదనం కల్పించేందుకు జిల్లా కలెక్టర్ రాహుల్ శర్మ వినూత్న చర్యలు చేపట్టారు.ఘాట్లకు వెళ్లే మార్గాల్లో చలువ పందిళ్లు, కాళ్లకు వేడి తగలకుండా తాటి చాపలు పరచడంతో పాటు ప్రత్యేకంగా ‘మిస్ట్ ఫాగ్ స్ప్రింక్లర్ల’ ద్వారా భక్తులపై చల్లటి నీటి జల్లులు కురిపిస్తున్నారు.ప్రతి ఒక్కరికీ తాగునీరు, మజ్జిగ, జీవన రక్షక ఔషధాల (ఓఆర్ఎస్) ప్యాకెట్లను అందుబాటులో ఉంచారు.దేవాదాయ శాఖ ఆధ్వర్యంలో రూ. 1.20 కోట్లతో ప్రత్యేక ప్రదర్శనశాలను (మ్యూజియం) ఏర్పాటు చేయగా,రూ. 30 లక్షలతో ఇక్కడి నాగేంద్రస్వామి ఆలయాన్ని పునర్నిర్మించారు.తాత్కాలిక బస్టాండ్ల నుండి ఘాట్ల వరకు భక్తులను ఉచితంగా చేరవేసేందుకు 90 ప్రయాణ బస్సులను (షటిల్ బస్సులను) నడుపుతున్నారు.సుమారు లక్షా 70 వేల వాహనాల కోసం 245 ఎకరాల విస్తీర్ణంలో 23 పార్కింగ్ కేంద్రాలను సర్వసౌకర్యాలతో సిద్ధం చేశారు.
కట్టుదిట్టమైన భద్రత – రక్షణ చర్యలు
భక్తుల రక్షణ కోసం, నది లోపలికి ఎవరూ వెళ్లకుండా ప్రమాద హెచ్చరికల బోర్డులను, రక్షణ కంచెలను ఏర్పాటు చేశారు.ఎటువంటి అవాంఛనీయ సంఘటనలు జరగకుండా నిరంతర పహారా కోసం 50 మంది ప్రత్యేక శిక్షణ పొందిన గజ ఈతగాళ్లను, సేఫ్టీ బోట్లను, లైఫ్ రింగులను, రాష్ట్ర విపత్తు స్పందన దళాలను (ఎస్డీఆర్ఎఫ్) రంగంలోకి దించారు.క్షేత్ర పరిసరాలలో నిఘా కోసం 200 సీసీ కెమెరాలను ఏర్పాటు చేసి కంట్రోల్ రూమ్కు అనుసంధానించారు.భక్తుల రద్దీని క్రమబద్ధీకరించడానికి,శాంతిభద్రతల పరిరక్షణకు గాను 2,500 మంది పోలీసులతో పటిష్టమైన బందోబస్తును ఏర్పాటు చేశారు.అలాగే 23 జోన్లలో 300 మంది వైద్య సిబ్బందితో అత్యవసర చికిత్సా శిబిరాలను,అంబులెన్సులను సిద్ధంగా ఉంచారు.మహాదేవపూర్ ప్రాథమిక ఆరోగ్య కేంద్రాన్ని ప్రధాన రెఫరల్ ఆసుపత్రిగా మార్చారు.పరిసరాల పరిశుభ్రత కోసం 300 మంది పారిశుద్ధ్య కార్మికులు నిరంతరం శ్రమిస్తున్నారు.ఈ 12 రోజుల పాటు భక్తులు ఎలాంటి ఇబ్బందులు పడకుండా అన్ని శాఖలు సమన్వయంతో పనిచేస్తున్నాయని,భక్తులు అధికారుల సూచనలు పాటిస్తూ జిల్లా యంత్రాంగానికి సహకరించాలని కలెక్టర్ రాహుల్ శర్మ విజ్ఞప్తి చేశారు.
About the Author
