అధికారాల దుర్వినియోగమా..?
నష్కల్ గ్రామంలో ఆరుగురి ఇళ్లకు విద్యుత్ కనెక్షన్ల తొలగింపు
చట్టబద్ధతపై తలెత్తుతున్న ప్రశ్నలు.. అధికార వర్గాల్లో చర్చ జనగామ జిల్లా నష్కల్ గ్రామంలో మద్యపాన రహిత గ్రామం లక్ష్యంగా గ్రామ పంచాయతీ చేపట్టిన చర్యలు ఇప్పుడు జిల్లావ్యాప్తంగా చర్చనీయాంశంగా మారాయి. గ్రామంలో అక్రమంగా మద్యం విక్రయిస్తున్నట్లు ఆరోపణలు ఎదుర్కొంటున్న ఆరుగురి ఇళ్లకు విద్యుత్ కనెక్షన్లను తొలగించినట్లు సర్పంచ్ శాతబోయిన రాజు ప్రకటించడం సంచలనంగా మారింది. గ్రామసభలో తీసుకున్న ఏకగ్రీవ నిర్ణయం మేరకే ఈ చర్యలు చేపట్టినట్లు ఆయన వెల్లడించారు.సర్పంచ్ తెలిపిన వివరాల ప్రకారం, గ్రామంలో బెల్ట్ షాపుల కారణంగా యువత మద్యానికి బానిసలవుతోందని, కుటుంబాలు ఆర్థికంగా, సామాజికంగా నష్టపోతున్నాయని గ్రామసభలో పలువురు ఆందోళన వ్యక్తం చేశారు.ఈ నేపథ్యంలో గ్రామాన్ని పూర్తిస్థాయి మద్యపాన రహిత గ్రామంగా మార్చాలని తీర్మానించి, మద్యం విక్రయించే వారిపై కఠిన చర్యలకు గ్రామస్థులు మద్దతు తెలిపినట్లు పేర్కొన్నారు.ఈ క్రమంలో మద్యం విక్రయిస్తున్నట్లు గుర్తించిన ఆరుగురి ఇళ్లకు విద్యుత్ సరఫరాను నిలిపివేసినట్లు సర్పంచ్ తెలిపారు.అంతేకాకుండా, ఇకపై మద్యం విక్రయించబోమని బాండ్ పేపర్పై లిఖితపూర్వకంగా హామీ ఇస్తేనే విద్యుత్ కనెక్షన్లను పునరుద్ధరిస్తామని స్పష్టం చేశారు. మద్యం విక్రయాన్ని కొనసాగిస్తే రేషన్ కార్డు, ఇతర ప్రభుత్వ సంక్షేమ పథకాల ప్రయోజనాలపైనా చర్యలు తీసుకుంటామని హెచ్చరించారు.అయితే ఈ చర్యల చట్టబద్ధతపై పలు ప్రశ్నలు వ్యక్తమవుతున్నాయి.విద్యుత్ కనెక్షన్లను నిలిపివేయడం లేదా తొలగించడం సంబంధిత విద్యుత్ పంపిణీ సంస్థల అధికార పరిధిలో ఉంటుంది. అదేవిధంగా అక్రమ మద్యం విక్రయాలపై కేసులు నమోదు చేయడం, దాడులు నిర్వహించడం, మద్యం స్వాధీనం చేసుకోవడం వంటి చర్యలు ఎక్సైజ్ శాఖ, పోలీసు శాఖ పరిధిలో ఉంటాయి.గ్రామసభ తీర్మానం ఉన్నప్పటికీ, సంబంధిత చట్టాలు, నిబంధనలను అనుసరించకుండా ఇలాంటి చర్యలు తీసుకోవడం ఎంతవరకు చట్టబద్ధమనే అంశంపై న్యాయ నిపుణులు సందేహాలు వ్యక్తం చేస్తున్నారు.మరోవైపు, గ్రామంలో మద్యం విక్రయాలను అరికట్టేందుకు గ్రామస్థులు, మహిళలు తీసుకున్న నిర్ణయాన్ని పలువురు అభినందిస్తున్నారు.మద్యపానం వల్ల కుటుంబాల్లో తలెత్తుతున్న సమస్యలను దృష్టిలో ఉంచుకుని గ్రామస్థులు కఠిన వైఖరి అవలంబించడం సామాజికంగా మంచి పరిణామమేనని అభిప్రాయపడుతున్నారు.అయితే చట్టాన్ని అమలు చేసే క్రమంలో సంబంధిత ప్రభుత్వ శాఖల సహకారంతోనే ముందుకు వెళ్లాలని సూచిస్తున్నారు.ఈ ఘటనపై విద్యుత్ శాఖ, ఎక్సైజ్ శాఖ, జిల్లా పరిపాలన నుంచి అధికారిక వివరణ వెలువడాల్సి ఉంది.సర్పంచ్ తీసుకున్న చర్యలకు సంబంధిత శాఖల అనుమతి ఉందా? విద్యుత్ కనెక్షన్ల తొలగింపు అధికారిక ప్రక్రియ ప్రకారమే జరిగిందా? గ్రామసభ తీర్మానం ఆధారంగా ఇలాంటి చర్యలు తీసుకునే అధికారం ఉందా? వంటి అంశాలపై స్పష్టత రావాల్సి ఉంది.మద్యం నియంత్రణ లక్ష్యం ఎంత గొప్పదైనా, చట్టబద్ధమైన విధానాల ద్వారానే దానిని అమలు చేయాల్సిన అవసరం ఉందని న్యాయ నిపుణులు, ప్రజాసంఘాల ప్రతినిధులు అభిప్రాయపడుతున్నారు.ప్రస్తుతం నష్కల్ గ్రామ ఘటన జిల్లాలోనే కాక రాష్ట్రవ్యాప్తంగా చర్చకు దారితీసింది.
About the Author
