రావులపల్లి గ్రామంలో వైభవంగా శ్రీ సీతారాముల కళ్యాణ మహోత్సవం
శ్రీరామనవమి పర్వదినాన్ని పురస్కరించుకుని రేగొండ మండలం రావులపల్లి గ్రామంలోని శ్రీ పట్టాభి సీతారామ స్వామి దేవాలయంలో శ్రీ సీతారాముల కళ్యాణ మహోత్సవం అత్యంత వైభవంగా, భక్తిశ్రద్ధల మధ్య ఘనంగా నిర్వహించబడింది.ఉదయం 11:32 గంటలకు శుభ ముహూర్తంలో వేదమంత్రాల నడుమ స్వామివారి కళ్యాణం శాస్త్రోక్తంగా జరగగా, ఈ వేడుకను దర్శించేందుకు పరిసర ప్రాంతాల నుంచి భారీగా భక్తులు తరలివచ్చారు.ఈ మహోత్సవానికి భూపాలపల్లి ఎమ్మెల్యే గండ్ర సత్యనారాయణ రావు,బీజేపీ రాష్ట్ర అధికార ప్రతినిధి చందుపట్ల కీర్తి రెడ్డి,జిల్లా బీజేపీ అధ్యక్షుడు ఏడు నూతుల నిషిధర్ రెడ్డి, ఎన్ ఎస్ ఆర్ సంస్థల అధినేత నాయినేని సంపత్ రావు ముఖ్య అతిథులుగా హాజరై స్వామివారి సేవలో పాల్గొన్నారు.అలాగే రేగొండ ఎస్సై డి. సుధాకర్, కాంగ్రెస్ నాయకులు మోడెం ఉమేష్ గౌడ్,పట్టెం శంకర్ తదితరులు కళ్యాణ మహోత్సవాన్ని తిలకించారు.ప్రత్యేకంగా రేగొండ సర్పంచ్ వారణాసి మౌనిక అంజి దంపతులు ఈ కార్యక్రమంలో పాల్గొని భక్తితో స్వామివారిని సేవించి,సమాజానికి ఆదర్శంగా నిలిచారు. ప్రజాప్రతినిధులుగా ఆధ్యాత్మిక కార్యక్రమాల్లో పాల్గొనడం ద్వారా గ్రామస్థులకు మంచి సందేశం అందించారు.ఆలయ కమిటీ చైర్మన్ మేకల బిక్షపతి ఆధ్వర్యంలో ఈ మహోత్సవానికి విస్తృత ఏర్పాట్లు చేపట్టారు.కార్యక్రమానికి విచ్చేసిన ప్రముఖులను సాదరంగా ఆహ్వానించి శాలువాలు కప్పి సత్కరించారు.గ్రామ పెద్దలు,యువకులు,సేవా దాతలు కలిసి ఈ కార్యక్రమాన్ని విజయవంతం చేయడంలో కీలక పాత్ర పోషించారు.ఈ సందర్భంగా సాయిబాబా భక్తులు ఓదెల మల్లయ్య స్వామి ఆధ్వర్యంలో ఆలయ ప్రాంగణంలో స్వామివారి సేవలో పాల్గొని భక్తులకు తీర్థప్రసాదంగా బెల్లం పానకం పంపిణీ చేశారు.ఈ పానకాన్ని స్వీకరించిన భక్తులు భక్తి పరవశంలో మంత్రముగ్ధులయ్యారు.ఈ సేవ కార్యక్రమం భక్తుల మనసులను హత్తుకుని ప్రత్యేక ఆకర్షణగా నిలిచింది.సుమారు 2500 మందికి పైగా భక్తులు ఈ కళ్యాణ మహోత్సవంలో పాల్గొని స్వామివారి దర్శనం చేసుకొని తీర్థప్రసాదాలు స్వీకరించారు. అనంతరం ఏర్పాటు చేసిన అన్నదాన కార్యక్రమంలో భక్తులు పెద్ద ఎత్తున పాల్గొని అన్నప్రసాదాన్ని స్వీకరించారు.భక్తులకు ఎలాంటి అసౌకర్యం కలగకుండా ఆలయ ప్రాంగణంలో విశాలమైన పండల్లు ఏర్పాటు చేసి, కూర్చునేందుకు సౌకర్యాలు కల్పించారు. తాగునీటి సదుపాయాలు, పారిశుద్ధ్య ఏర్పాట్లు, వాహనాల పార్కింగ్ వంటి అన్ని ఏర్పాట్లు సమగ్రంగా చేపట్టారు.భక్తుల రద్దీ దృష్ట్యా భద్రతా చర్యలను కట్టుదిట్టంగా అమలు చేసి, వాలంటీర్ల ద్వారా భక్తులకు మార్గదర్శనం చేశారు.కళ్యాణ మహోత్సవం అనంతరం ఆలయ ప్రాంగణంలో నిర్వహించిన భజన కార్యక్రమం భక్తులను మంత్రముగ్ధులను చేసింది.శ్రీరామ నామస్మరణతో ఆలయం మారుమోగిపోగా,భక్తులు ఆధ్యాత్మిక ఆనందాన్ని ఆస్వాదించారు.మొత్తం మీద ఈ శ్రీ సీతారాముల కళ్యాణ మహోత్సవం రావులపల్లి గ్రామంలో భక్తి, సంప్రదాయం,ఐక్యతలకు ప్రతీకగా నిలిచి ఘనవిజయాన్ని సాధించింది. ఈ కార్యక్రమాన్ని విజయవంతంగా నిర్వహించిన ఆలయ కమిటీ సభ్యులను గ్రామస్తులు అభినందిస్తూ,ఇలాంటి ఆధ్యాత్మిక కార్యక్రమాలు మరింతగా నిర్వహించాలని ఆకాంక్షించారు
About the Author
