మా సంఘంలో ఉన్నవారే జర్నలిస్టులు.. రాజకీయ నాయకులు, ప్రజాప్రతినిధులు, అధికారులు మాకే వార్తలు పంపాలి..మిగతా వారితో మాకు సంబంధం లేదంటూ సందేశాలు!

జర్నలిజం ఎవరి సొత్తు కాదు..వృత్తిపరమైన స్వేచ్ఛను అడ్డుకునే అధికారం ఎవరికీ లేదు

ఉమ్మడి వరంగల్ నవంబర్ 21(e69news-తెలుగు గళం న్యూస్)

ప్రజాస్వామ్య వ్యవస్థలో నాలుగో స్తంభంగా గుర్తింపు పొందిన జర్నలిజం రంగంలో కొందరు జర్నలిస్టు సంఘాల నాయకుల వ్యవహారశైలి వివాదాస్పదంగా మారుతోంది. జర్నలిస్టుల హక్కుల పరిరక్షణ కోసం ఏర్పడిన సంఘాలే ఇతర జర్నలిస్టుల వృత్తిపరమైన స్వేచ్ఛకు అడ్డంకులు సృష్టిస్తున్నాయనే విమర్శలు వ్యక్తమవుతున్నాయి.యూనియన్ల పేరుతో తమ సంఘంలో లేని జర్నలిస్టులపై వివక్ష చూపుతూ, వార్తలు రాయకుండా అడ్డుకునే ప్రయత్నాలు జరుగుతున్నాయనే ఆరోపణలు ఆందోళన కలిగిస్తున్నాయి.ఉమ్మడి వరంగల్ జిల్లా వ్యాప్తంగా కొన్ని ప్రాంతాల్లో జర్నలిస్టు సంఘాల నాయకులు, ప్రతినిధులు, సభ్యులు తమ సంఘంలో లేని ఇతర జర్నలిస్టులను చిన్నచూపు చూస్తూ వ్యవహరిస్తున్నారనే విమర్శలు వినిపిస్తున్నాయి.ముఖ్యంగా వరంగల్ జిల్లా పర్వతగిరి మండలంలో ఓ జర్నలిస్టు సంఘం పేరుతో వాట్సాప్‌లో పెట్టిన సందేశాలు ఈ వివాదానికి కేంద్రంగా మారాయి. తమ సంఘంలో ఉన్నవారు మాత్రమే జర్నలిస్టులని, వారే వార్తలు రాయాలని, మిగతా జర్నలిస్టులతో తమకు ఎలాంటి సంబంధం లేదన్నట్లుగా సందేశాలు పెట్టడం చర్చనీయాంశమైంది.ఇంతటితో ఆగకుండా రాజకీయ నాయకులు, ప్రజాప్రతినిధులు, ప్రభుత్వ అధికారులు తమ సంఘానికి చెందిన జర్నలిస్టులకు మాత్రమే వార్తా సమాచారం పంపించాలని, ఇతర జర్నలిస్టులకు సమాచారం పంపాల్సిన అవసరం లేదన్నట్లుగా వ్యవహరించడం మరింత అభ్యంతరకరంగా మారింది. ఒక సంఘంలో సభ్యత్వం ఉన్నవారికే వార్తలు పంపాలనే నిబంధనను ఎవరు విధించారు? ప్రజాప్రతినిధులు, అధికారులు ఎవరికి సమాచారం ఇవ్వాలో నిర్ణయించే అధికారం ఏదైనా జర్నలిస్టు సంఘానికి ఉందా? అనే ప్రశ్నలు తలెత్తుతున్నాయి.ప్రజలకు సంబంధించిన ప్రభుత్వ కార్యక్రమాలు, అభివృద్ధి పనులు, సంక్షేమ పథకాలు, ప్రజా సమస్యలకు సంబంధించిన సమాచారం ఏ ఒక్క సంఘానికో పరిమితం కాకూడదు. ప్రజలకు వార్తలు చేరవేయడం మీడియా సంస్థల బాధ్యత.ప్రజాప్రతినిధులు, అధికారులు కూడా ప్రజలకు సంబంధించిన సమాచారాన్ని అందుబాటులో ఉన్న అన్ని మీడియా సంస్థలకు సమానంగా అందించే విధానం పాటించాలి. ఒక సంఘానికి సమాచారం పంపించి, మరో సంస్థకు పంపకుండా వివక్ష చూపడం ప్రజలకు సమాచారం చేరే అవకాశాలను కూడా పరిమితం చేస్తుంది.జర్నలిజం అనేది ఏ ఒక్క సంఘానికో, వ్యక్తికో, వర్గానికో పరిమితమైన వ్యవస్థ కాదు.సమాజంలోని సమస్యలను వెలుగులోకి తీసుకురావడం, ప్రజల గొంతుకగా నిలవడం, ప్రభుత్వాలు మరియు అధికార యంత్రాంగం దృష్టికి ప్రజా సమస్యలను తీసుకెళ్లడం జర్నలిస్టుల ప్రధాన బాధ్యత. ఈ రంగంపై ఆసక్తితో, సామాజిక బాధ్యతతో ఎలాంటి జీతభత్యాలు ఆశించకుండా ప్రజాసేవే లక్ష్యంగా వార్తలు రాస్తున్న వారు కూడా ఉన్నారు. అలాంటి వారిని సంఘాల పేరుతో కించపరచడం, వారి వృత్తిపరమైన స్వేచ్ఛకు ఆటంకం కలిగించడం ఎంతవరకు సమంజసమనే ప్రశ్నలు వ్యక్తమవుతున్నాయి.ప్రస్తుతం రాష్ట్రవ్యాప్తంగా అనేక దినపత్రికలు, వారపత్రికలు, మాసపత్రికలు, వార్తా చానళ్లు, డిజిటల్ మీడియా సంస్థలు పనిచేస్తున్నాయి. ఆయా సంస్థల్లో బాధ్యతలు నిర్వహిస్తున్న జర్నలిస్టులందరికీ వృత్తిపరమైన గౌరవం దక్కాలి. ఒక జర్నలిస్టు ఏ సంఘంలో సభ్యుడిగా ఉన్నాడనే అంశం ఆధారంగా అతడి వృత్తిని నిర్ణయించడం తగదు. సంఘంలో సభ్యత్వం అనేది వ్యక్తిగత ఎంపిక.అది ఇతరుల వృత్తిపరమైన హక్కులను అడ్డుకునే సాధనంగా మారకూడదు.ఒక సంఘం రిజిస్ట్రేషన్ చేసుకున్నంత మాత్రాన ఆ సంఘంలోని వారే అసలైన జర్నలిస్టులు, మిగతావారు జర్నలిస్టులు కాదని ప్రకటించే అధికారం ఎవరికీ లేదు. ప్రభుత్వ నిబంధనలు, సంబంధిత మీడియా సంస్థల విధివిధానాలకు అనుగుణంగా పనిచేస్తున్న జర్నలిస్టులందరినీ గౌరవించాల్సిన అవసరం ఉంది. గుర్తింపు కార్డు, సంఘం సభ్యత్వం, వృత్తిపరమైన అర్హతలు వంటి అంశాలను వాటి వాటి నిబంధనల ప్రకారం చూడాలి తప్ప వ్యక్తిగత అభిప్రాయాలతో ఇతరులను పక్కన పెట్టకూడదు.జర్నలిస్టు సంఘాల ప్రధాన లక్ష్యం జర్నలిస్టుల సంక్షేమం, భద్రత, వృత్తిపరమైన హక్కుల పరిరక్షణ కావాలి. ఇతర జర్నలిస్టులను అడ్డుకోవడం, వారిని వృత్తికి దూరం చేయడం, ప్రజాప్రతినిధులు, అధికారులకు ఒక సంఘం వారికే సమాచారం పంపాలని సూచించడం సంఘాల బాధ్యతలకు విరుద్ధంగా మారే ప్రమాదం ఉంది.సంఘాల మధ్య ఐక్యత, పరస్పర గౌరవం పెంపొందించాల్సిన సమయంలో ఇలాంటి వ్యవహారాలు జర్నలిస్టుల మధ్య అనవసర విభేదాలకు దారితీస్తాయి.

జిల్లా స్థాయి నాయకులు స్పందించాలి

ఉమ్మడి వరంగల్ జిల్లా జర్నలిస్టు సంఘాల పెద్దలు ఈ వ్యవహారంపై దృష్టి సారించాలి.పర్వతగిరి మండలంలో చోటుచేసుకున్నట్లు చెబుతున్న పరిణామాలపై వాస్తవాలు పరిశీలించి, జర్నలిస్టుల మధ్య వివక్షకు తావులేకుండా చర్యలు తీసుకోవాలి.అలాగే రాజకీయ నాయకులు, ప్రజాప్రతినిధులు, ప్రభుత్వ అధికారులు కూడా ఏ ఒక్క సంఘానికో పరిమితం కాకుండా అన్ని మీడియా సంస్థలకు సమానంగా సమాచారాన్ని అందించే విధానాన్ని పాటించాలి.జర్నలిజం ఎవరి సొత్తు కాదు..యూనియన్లు హక్కుల పరిరక్షణ కోసం ఉండాలి కానీ, ఇతర జర్నలిస్టుల హక్కులను కాలరాయడానికి కాదు.సంఘాలు వేరు కావచ్చు.. కానీ ప్రజలకు వార్తలు అందించాలనే లక్ష్యం ఒక్కటే కావాలి!

About The Author

By E69NEWS

Leave a Reply

Your email address will not be published. Required fields are marked *