గ్రామీణ విద్యార్థులలో సృజనాత్మకతకు రెక్కలు
మడ్తపల్లి ప్రభుత్వ పాఠశాల లో ప్రథమ్ సంస్థ రెండు రోజుల విజువల్ ఆర్ట్స్ శిక్షణ
జయశంకర్ భూపాలపల్లి జిల్లా,రేగొండ మండలం మడ్తపల్లి గ్రామంలో ఉన్న జిల్లా పరిషత్ ఉన్నత పాఠశాల మడ్తపల్లిలో ప్రథమ్ ఎడ్యుకేషన్ ఫౌండేషన్ ఆధ్వర్యంలో నిర్వహించిన రెండు రోజుల విజువల్ ఆర్ట్స్ శిక్షణ కార్యక్రమం విద్యార్థుల్లో విశేష ఉత్సాహాన్ని నింపింది.గ్రామీణ ప్రాంతాల్లోని పిల్లలలో సృజనాత్మకతను వెలికి తీయడం, వృత్తి నైపుణ్యాలను పెంపొందించడం, భవిష్యత్ అవకాశాలకు దారితీయడం అనే లక్ష్యంతో ఈ కార్యక్రమాన్ని నిర్వహించినట్లు నిర్వాహకులు తెలిపారు.బెంగళూరు నుంచి వచ్చిన విజువల్ ఆర్ట్స్ నిపుణుడు కృష్ణమూర్తి విద్యార్థులకు ప్రాయోగిక పద్ధతుల్లో శిక్షణ అందించారు. రంగుల వినియోగం, చిత్రలేఖనం, ఆకృతుల రూపకల్పన, భావ వ్యక్తీకరణ, సృజనాత్మక ఆలోచనల రూపాంతరం వంటి అంశాలపై ప్రత్యేకంగా దృష్టి సారించారు.తరగతిలో సాధారణంగా పుస్తకాలకే పరిమితమయ్యే విద్యార్థులు, ఈ శిక్షణలో తమ ఆలోచనలను బొమ్మల రూపంలో వ్యక్తపరచడంతో వారి ఆత్మవిశ్వాసం మరింత పెరిగిందని ఉపాధ్యాయులు తెలిపారు.ప్రథమ్ ఎడ్యుకేషన్ ఫౌండేషన్ క్రియేటివిటీ క్లబ్ కోఆర్డినేటర్ శ్రీహరి సింగ్ మాట్లాడుతూ, గ్రామీణ విద్యార్థులు కూడా నగరాల విద్యార్థులతో సమానంగా ప్రతిభను ప్రదర్శించగలరని ఈ కార్యక్రమం నిరూపించిందన్నారు.జిల్లా కోఆర్డినేటర్ బాబు మైస, క్లస్టర్ హెడ్ పి. సంతోష్, వాలంటీర్ గోపాల్ రెడ్డి తదితరులు విద్యార్థులను ఉత్సాహపరిచి,భవిష్యత్తులో మరిన్ని నైపుణ్యాభివృద్ధి కార్యక్రమాలు నిర్వహిస్తామని తెలిపారు.రెండు రోజుల శిక్షణ ముగిసిన అనంతరం ప్రథమ్ ఎడ్యుకేషన్ ఫౌండేషన్ తరఫున పాఠశాలకు ఒక కంప్యూటర్ను బహూకరించడం విశేషం.ఈ కంప్యూటర్ ద్వారా విద్యార్థులు డిజిటల్ విద్యలో అడుగుపెట్టి, ఆన్లైన్ విద్యా వనరులను వినియోగించుకునే అవకాశం లభిస్తుందని పాఠశాల యాజమాన్యం అభిప్రాయపడింది. గ్రామీణ ప్రాంతాల్లో సాంకేతిక పరిజ్ఞానం పెంపొందించడంలో ఈ దానం కీలక పాత్ర పోషిస్తుందని పేర్కొన్నారు.పాఠశాల ప్రధానోపాధ్యాయురాలు సూరం లక్ష్మి మాట్లాడుతూ,విజువల్ ఆర్ట్స్ ద్వారా పిల్లలలో సృజనాత్మకత మాత్రమే కాకుండా, సమస్యలను పరిష్కరించే సామర్థ్యం,బృందంగా పనిచేసే నైపుణ్యం కూడా పెరుగుతుందని తెలిపారు.ప్రథమ్ సంస్థ చేస్తున్న సేవలు అభినందనీయమని,ఈ తరహా కార్యక్రమాలు నిరంతరం కొనసాగితే గ్రామీణ విద్యార్థుల భవిష్యత్తు మరింత ప్రకాశవంతమవుతుందని ఆమె పేర్కొన్నారు.ఈ కార్యక్రమంలో పాఠశాల ఉపాధ్యాయ బృందం,గ్రామస్తులు కూడా పాల్గొని విద్యార్థులను ప్రోత్సహించారు.విద్యార్థులు తమ సృష్టించిన చిత్రాలను చిన్న ప్రదర్శనగా ఏర్పాటు చేయగా,తల్లిదండ్రులు మరియు గ్రామస్తులు వాటిని వీక్షించి ఆనందం వ్యక్తం చేశారు.ఈ శిక్షణ ద్వారా విద్యార్థులు చదువుతో పాటు కళారంగం,డిజైన్,సృజనాత్మక రంగాల్లో కూడా తమ కెరీర్ను నిర్మించుకునే దిశగా ప్రేరణ పొందారని పలువురు అభిప్రాయపడ్డారు.గ్రామీణ విద్యాభివృద్ధికి ప్రథమ్ ఎడ్యుకేషన్ ఫౌండేషన్ చేస్తున్న కృషి మరింత విస్తరించాలని, భవిష్యత్తులో మరిన్ని పాఠశాలల్లో ఇలాంటి శిక్షణ కార్యక్రమాలు నిర్వహించాలని స్థానికులు కోరుతున్నారు.ఈ కార్యక్రమం విద్యార్థుల జీవితాల్లో ఒక మైలురాయిగా నిలిచిందని,వారి కలలకు కొత్త దిశను చూపిందని వారు పేర్కొన్నారు
About The Author
