నారాయణగిరి పాఠశాలలో సీఎం అల్పాహార పథకానికి శ్రీకారం
ధర్మసాగర్ (ఈ69న్యూస్), సెప్టెంబర్ 3
విద్యార్థుల భవిష్యత్తుకు పౌష్టికాహారమే పునాది అని భావిస్తూ కాంగ్రెస్ ప్రభుత్వం సీఎం అల్పాహార పథకాన్ని ప్రతిష్ఠాత్మకంగా అమలు చేస్తోందని నారాయణగిరి గ్రామ సర్పంచ్ పుట్ట రేణుక కుమారస్వామి అన్నారు.ధర్మసాగర్ మండలం నారాయణగిరి గ్రామంలోని జిల్లా పరిషత్ ఉన్నత పాఠశాలలో గురువారం సీఎం అల్పాహార పథకాన్ని సర్పంచ్ పుట్ట రేణుక కుమారస్వామి లాంఛనంగా ప్రారంభించారు. ఈ సందర్భంగా విద్యార్థులకు అల్పాహారం అందించి, వారితో కలిసి భోజనం చేశారు. అనంతరం విద్యార్థులతో మాట్లాడి వారి సమస్యలు, పాఠశాలలోని సౌకర్యాలపై వివరాలు అడిగి తెలుసుకున్నారు.
ఆకలి దూరం.. చదువుపై ఏకాగ్రత
ఈ సందర్భంగా సర్పంచ్ మాట్లాడుతూ..విద్యార్థులు ఉదయం అల్పాహారం తీసుకోకుండా పాఠశాలకు వస్తే తరగతుల సమయంలో ఆకలి, నీరసం కారణంగా చదువుపై ఏకాగ్రత తగ్గే అవకాశం ఉందన్నారు. ఈ సమస్యను అధిగమించడంతో పాటు విద్యార్థులకు అవసరమైన పౌష్టికాహారం అందించాలనే లక్ష్యంతో ప్రభుత్వం సీఎం అల్పాహార పథకాన్ని అమలు చేస్తోందని తెలిపారు.పేద, మధ్యతరగతి కుటుంబాలకు చెందిన విద్యార్థులకు ఈ పథకం ఎంతో ప్రయోజనకరంగా ఉంటుందని పేర్కొన్నారు.విద్యార్థుల ఆరోగ్యం మెరుగుపడటంతో పాటు పాఠశాల హాజరు, చదువుపై ఆసక్తి, ఏకాగ్రత పెరగడానికి ఈ పథకం దోహదపడుతుందని అన్నారు.
విద్యతో పాటు ఆరోగ్యానికి ప్రాధాన్యం
కాంగ్రెస్ ప్రభుత్వం విద్యార్థుల విద్యాభివృద్ధితో పాటు వారి ఆరోగ్యం, పోషకాహారంపై ప్రత్యేక దృష్టి సారిస్తోందని సర్పంచ్ తెలిపారు. ప్రభుత్వం అమలు చేస్తున్న ఈ పథకాన్ని విద్యార్థులు సద్వినియోగం చేసుకుని ఆరోగ్యంగా ఉంటూ చదువులో రాణించాలని ఆకాంక్షించారు.ఈ కార్యక్రమంలో ఉపసర్పంచ్, వార్డు సభ్యులు, గ్రామపంచాయతీ కార్యదర్శి, పాఠశాల ప్రధానోపాధ్యాయులు, ఉపాధ్యాయులు, విద్యార్థులు, గ్రామపంచాయతీ సిబ్బంది తదితరులు పాల్గొన్నారు.
About The Author
