దేశంలో పెరుగుతున్న నిత్యావసరాల ధరలు,నాణ్యత నియంత్రణలో లోపాలపై వరంగల్ ఎంపీ డాక్టర్ కడియం కావ్య బుధవారం లోక్సభలో ఆందోళన వ్యక్తం చేశారు.ప్రజలకు సరుకులు న్యాయమైన ధరలకు,ప్రమాణాలతో అందించాల్సిన బాధ్యత కేంద్ర ప్రభుత్వంపై ఉందని ఆమె గుర్తుచేశారు.ధరల పర్యవేక్షణ విధానం ఎంతవరకు ఫలప్రదంగా పనిచేస్తోందో,రిటైల్ మార్కెట్లలో నిత్యావసరాల ధరలను కేంద్రం ఎలా తనిఖీ చేస్తుందో వివరణ ఇవ్వాలని ఎంపీ కోరారు.అలాగే వాణిజ్య దుకాణాల తనిఖీలు,నాణ్యత నియంత్రణ చర్యలపై స్పష్టమైన వివరాలు అడిగారు.అదేవిధంగా సమాధానమిస్తూ వినియోగదారుల వ్యవహారాలు,ఆహార-పొదుపు పంపిణీ శాఖ సహాయమంత్రి బి.ఎల్. వర్మ—దేశవ్యాప్తంగా 575 కేంద్రాలలో నుంచి రోజూ 38 కీలక ఆహార పదార్థాల ధరలను సేకరించి ప్రైస్ మానిటరింగ్ సిస్టమ్కు అప్లోడ్ చేస్తున్నట్టు చెప్పారు.దీంతో మార్కెట్ ధరల మార్పులను తక్షణమే గుర్తించి చర్యలు తీసుకునే వీలుంటుందని పేర్కొన్నారు.ఫుడ్ సేఫ్టీ అండ్ స్టాండర్డ్స్ యాక్ట్-2006 ప్రకారం ప్రతి న్యాయధరక దుకాణం ఎఫ్.ఎస్.ఎస్.ఏ.ఐ లైసెన్స్ తప్పనిసరిగా పొందాలని,పరిశుభ్రత-శానిటేషన్ నియమాలు కచ్చితంగా అమలు చేయాలని మంత్రి గుర్తుచేశారు. నిబంధనలు ఉల్లంఘిస్తే చట్టపరమైన చర్యలు తప్పవని హెచ్చరించారు.ఎఫ్.ఎస్.ఎస్.ఏ.ఐ రాష్ట్రాలు,కేంద్రపాలిత ప్రాంతాలు,ప్రాంతీయ కార్యాలయాలతో కలిసి క్రమం తప్పకుండా తనిఖీలు,శాంపిలింగ్ నిర్వహిస్తున్నట్టు మంత్రి వివరించారు.పౌరులకు న్యాయమైన ధరలకు నాణ్యమైన ఆహారం అందాలంటే పర్యవేక్షణలో పారదర్శకత,బలమైన విధానాలు అవసరమని ఎంపీ డాక్టర్ కడియం కావ్య పేర్కొన్నారు.కేంద్రం మరింత కఠిన చర్యలు తీసుకోవాలని ఆమె కోరారు.
About The Author
