తెలంగాణ సంస్కృతి, సంప్రదాయాలపై విద్యార్థులకు అవగాహనపూల పండుగ ప్రత్యేకతను చాటిన విద్యార్థినీ విద్యార్థులు
ధర్మసాగర్, అక్టోబర్ 9 (E69NEWS:
ధర్మసాగర్ మండలం తాటికాయల గ్రామంలోని ఉన్నత, ప్రాథమిక పాఠశాలల్లో బతుకమ్మ సంబరాలను ఉపాధ్యాయులు, విద్యార్థినీ విద్యార్థులు ఘనంగా నిర్వహించారు. రంగురంగుల పూలతో బతుకమ్మలను పేర్చి, సంప్రదాయ పాటలు, నృత్యాలతో సందడి చేశారు. తెలంగాణ సంస్కృతి, సంప్రదాయాల గొప్పతనాన్ని చాటిచెప్పారు.ఈ సందర్భంగా విద్యార్థినులు తంగేడు, గునుగు, బంతి, చామంతి తదితర పూలతో బతుకమ్మలను అందంగా అలంకరించారు. బతుకమ్మల చుట్టూ చేరి సంప్రదాయ పాటలు పాడుతూ నృత్యాలు చేశారు. సాంస్కృతిక కార్యక్రమాల ద్వారా బతుకమ్మ పండుగ విశిష్టతను, ప్రకృతితో మానవ జీవనానికి ఉన్న అనుబంధాన్ని తెలియజేశారు.
ప్రకృతిని పూజించే పూల పండుగ బతుకమ్మ
తెలంగాణ ఆడపడుచుల ఆత్మీయతకు, ఐక్యతకు ప్రతీకగా నిలిచే బతుకమ్మ పండుగను ఆశ్వయుజ మాసంలో తొమ్మిది రోజులపాటు సంప్రదాయబద్ధంగా జరుపుకుంటారని ఉన్నత పాఠశాల ప్రధానోపాధ్యాయురాలు మేరీ తెలిపారు. వివిధ రకాల పూలతో బతుకమ్మలను పేర్చి గౌరమ్మను పూజించడం ఈ పండుగ ప్రత్యేకత అని పేర్కొన్నారు. మహిళలు, యువతులు సమూహాలుగా చేరి పాటలు పాడుతూ బతుకమ్మ చుట్టూ నృత్యాలు చేయడం ద్వారా సాంస్కృతిక వారసత్వాన్ని తరతరాలకు అందిస్తున్నారని వివరించారు. ప్రకృతిని గౌరవించడం, కుటుంబాల సౌభాగ్యాన్ని కోరుకోవడం, సమాజంలో ఐకమత్యాన్ని పెంపొందించడం బతుకమ్మ పండుగలోని ప్రధాన సందేశాలని తెలిపారు.
ఉపాధ్యాయుల ఆధ్వర్యంలో వేడుకలు
తాటికాయల ఉన్నత పాఠశాలలో ప్రధానోపాధ్యాయురాలు మేరీ ఆధ్వర్యంలో ఉపాధ్యాయులు నవీన్ కుమార్, ఉషారాణి, వసుంధర, శ్రీనివాస్, రాజు, ఇంద్రాణి, దీప్తి కార్యక్రమ నిర్వహణలో పాల్గొన్నారు. ప్రాథమిక పాఠశాలలో ప్రధానోపాధ్యాయుడు రాజు ఆధ్వర్యంలో ఉపాధ్యాయులు హేమలత, దయామణి, యామిని విద్యార్థులతో కలిసి బతుకమ్మ వేడుకలను నిర్వహించారు.విద్యార్థులకు విద్యాబోధనతోపాటు తెలంగాణ సంస్కృతి, సంప్రదాయాలపై అవగాహన కల్పించడంలో భాగంగా ఈ వేడుకలు నిర్వహించారు. పాఠశాలల ఆవరణలు బతుకమ్మ పాటలు, నృత్యాలతో సందడిగా మారాయి. విద్యార్థినీ విద్యార్థులు ఆనందోత్సాహాల మధ్య పండుగను జరుపుకున్నారు.
About The Author
