ఇల్లందు పట్టణంలో ప్రభుత్వ వ్యవస్థల అసలు రూపం బయటపడింది. ఆసుపత్రుల నుంచి వసతి గృహాల వరకు ఎక్కడ చూసినా నిర్లక్ష్యం, అస్తవ్యస్త పరిస్థితులు కనిపించడంతో జిల్లా కలెక్టర్ అంకిత్ తీవ్ర ఆగ్రహంతో స్పందించారు. మంగళవారం నిర్వహించిన ఆకస్మిక తనిఖీలు అధికార యంత్రాంగం నిర్లక్ష్యాన్ని బహిర్గతం చేయగా, వెంటనే ఇద్దరు వార్డెన్లపై సస్పెన్షన్ వేటు పడింది.
ప్రభుత్వ ఏరియా ఆసుపత్రిలో పరిస్థితులు కలెక్టర్‌ను ఆగ్రహానికి గురిచేశాయి. ఆసుపత్రి ఎదుట ప్రైవేట్ అంబులెన్స్ అనుమానాస్పదంగా నిలిపివేయడంపై అధికారులను నిలదీస్తూ, “ప్రభుత్వ ఆసుపత్రి ప్రాంగణంలో ప్రైవేట్ దందాలు ఎలా?” అంటూ తీవ్రంగా ప్రశ్నించారు. అత్యవసర సమయంలో అధిక డబ్బు ఆశతో నిర్లక్ష్యం వహించడం వల్ల ఒక రోగి ప్రాణాలు కోల్పోయిన ఘటనపై మండిపడుతూ, సమగ్ర విచారణకు ఆదేశాలు జారీ చేశారు. “ఎమర్జెన్సీ సేవల్లో నిర్లక్ష్యం అస్సలు సహించం” అని హెచ్చరించారు.
ఇన్‌పేషెంట్ విభాగంలో రోగులతో నేరుగా మాట్లాడిన కలెక్టర్, అందుతున్న వైద్య సేవలపై అసంతృప్తి వ్యక్తం చేశారు. డయాలసిస్ కేసులు అధికంగా నమోదవుతున్న పరిస్థితిపై ప్రత్యేక అధ్యయనం చేయాలని ఆదేశించారు. సిబ్బంది హాజరు పుస్తకాలను పరిశీలించి విధుల్లో అలసత్వం ప్రదర్శిస్తే కఠిన చర్యలు తప్పవని హెచ్చరించారు.
ట్రైబల్ వెల్ఫేర్ బాలికల వసతి గృహంలో పరిస్థితులు మరింత ఆందోళనకరంగా కనిపించాయి. మెనూ పాటించకపోవడం, పోషకాహారం లోపించడం చూసి కలెక్టర్ తీవ్రంగా స్పందించారు. “పిల్లల ఆరోగ్యంతో ఆటలు ఆడితే సహించం” అంటూ స్పష్టం చేశారు. స్టోర్ రూమ్‌లో నాణ్యత లేని సరుకులు నిల్వ ఉంచడంపై మండిపడుతూ, తాగునీరు, ఫ్యాన్లు, భవన మరమ్మతులు వంటి సమస్యలను వెంటనే పరిష్కరించాలని ఆదేశించారు.
ట్రైబల్ వెల్ఫేర్ ఆశ్రమ బాలుర పాఠశాలలో పరిస్థితులు మరింత దిగజారిపోయాయి. భోజనం సమయాలపై సిబ్బంది స్పష్టత లేకపోవడం, మెనూ అమలు లేకపోవడం, పరిశుభ్రత లోపాలు గమనించి కలెక్టర్ ఆగ్రహం వ్యక్తం చేశారు. బాధ్యతారాహిత్యంగా వ్యవహరించిన వార్డెన్ భరత్‌ను తక్షణమే సస్పెండ్ చేయాలని ఆదేశించారు.
“వార్డెన్ లేని వసతి గృహం?” – కలెక్టర్ షాక్… వెంటనే సస్పెన్షన్ ఆదేశం
ఇల్లందు షెడ్యూల్ కులాల అభివృద్ధి శాఖ బాలుర వసతి గృహాన్ని పరిశీలించిన జిల్లా కలెక్టర్ అంకిత్‌కు అక్కడి పరిస్థితులు షాక్‌కు గురిచేశాయి. వసతి గృహంలో విద్యార్థులు ఉన్నప్పటికీ వార్డెన్ గానీ, సిబ్బంది గానీ ఎవరూ లేకపోవడం తీవ్ర నిర్లక్ష్యానికి నిదర్శనంగా నిలిచింది.
“ఇది వసతి గృహమా… లేక పూర్తిగా వదిలేసిన స్థలమా?” అంటూ కలెక్టర్ తీవ్ర ఆగ్రహం వ్యక్తం చేశారు. విద్యార్థుల భద్రతను పూర్తిగా పక్కనపెట్టిన ఈ ఘటనపై మండిపడుతూ, బాధ్యుడైన వార్డెన్‌పై కఠిన చర్యలు తీసుకుని వెంటనే సస్పెండ్ చేయాలని స్పష్టమైన ఆదేశాలు జారీ చేశారు.
బీసీ బాలుర వసతి గృహంలో కూడా సమయానికి భోజనం అందకపోవడం, సిబ్బంది పనితీరులో లోపాలు గమనించి వార్డెన్‌ను గట్టిగా హెచ్చరించారు. “విద్యార్థుల ఆహారం, ఆరోగ్యం మీ చేతుల్లో ఉంది – ఇది బాధ్యత కాదు, విధి” అని స్పష్టం చేశారు.
మొత్తంగా వసతి గృహాల నిర్వహణలో బయటపడిన ఘోర నిర్లక్ష్యం నేపథ్యంలో ఇద్దరు వార్డెన్లను సస్పెండ్ చేస్తూ కలెక్టర్ అంకిత్ స్పష్టమైన సందేశం ఇచ్చారు.
“విద్య, వైద్యం, సంక్షేమ రంగాల్లో నిర్లక్ష్యానికి ఇక తావు లేదు… బాధ్యత లేకపోతే పదవి ఉండదు” అని తేల్చిచెప్పారు.
ఈ తనిఖీలలో ఆసుపత్రి సూపరింటెండెంట్ హర్షవర్ధన్, ఆర్‌ఎంఓ రామ్ నివాస్, డాక్టర్ ప్రత్యూషతో పాటు సంబంధిత శాఖల అధికారులు పాల్గొన్నారు.
About The Author
