ఈ69న్యూస్ వరంగల్ ఏప్రిల్ 27
వరంగల్ జిల్లాలో డీజిల్ కొరత తీవ్ర సమస్యగా మారింది. జిల్లాలో చాలా ప్రాంతాల్లో డీజిల్ అందుబాటులో లేకపోవడంతో వాహనదారులు ఇబ్బందులు పడుతున్నారు. ఈ నేపథ్యంలో నాయుడు పెట్రోల్ పంపు వద్ద మాత్రమే డీజిల్ లభిస్తున్నట్లు సమాచారం ఉండటంతో అక్కడికి భారీగా వాహనాలు తరలివస్తున్నాయి.డీజిల్ కోసం బంక్ వద్ద ఎర్రటి ఎండలో పొడవైన క్యూలు కనిపించగా, వాహనాలు రోడ్డుపై నిలిచిపోవడంతో ట్రాఫిక్‌కు తీవ్ర అంతరాయం కలుగుతోంది. దీంతో ప్రయాణీకులు, వాహనదారులు గంటల తరబడి ఇబ్బందులు పడుతున్నారు.ఇక డీజిల్ కొరత ప్రభావం రైతులపై కూడా తీవ్రంగా పడుతోంది. ప్రస్తుతం వరి కోతల సీజన్ కొనసాగుతుండగా, డీజిల్ అందుబాటులో లేక హార్వెస్టర్లు, వ్యవసాయ యంత్రాలు నిలిచిపోయాయి. దీనివల్ల కోత పనులు ఆలస్యమవుతూ పంట నష్టపోయే ప్రమాదం ఉందని రైతులు ఆందోళన వ్యక్తం చేస్తున్నారు.అదే సమయంలో మామిడి సీజన్ కొనసాగుతుండటంతో మామిడి రైతులు కూడా తీవ్ర ఇబ్బందులు ఎదుర్కొంటున్నారు. తోటల నుంచి మార్కెట్లకు మామిడి తరలించడానికి వాహనాలు అవసరమైనప్పటికీ, డీజిల్ లేక రవాణా వ్యవస్థ స్తంభించిపోతోంది. దీంతో పండ్లు నిల్వ ఉండి నష్టపోయే పరిస్థితి ఏర్పడుతోంది.ఇక డీజిల్ కొరత ప్రభావం ఇతర వ్యాపారాలపై కూడా పడుతోంది. రవాణాపై ఆధారపడి ఉన్న సరుకు రవాణా, కూరగాయలు, పాలు, నిర్మాణ రంగం వంటి అనేక వ్యాపారాలు అంతరాయం ఎదుర్కొంటున్నాయి. సరుకు సమయానికి చేరకపోవడంతో వ్యాపారులు ఆర్థిక నష్టాలు చవిచూడాల్సి వస్తోంది.ఈ పరిస్థితిపై స్థానికులు ఆగ్రహం వ్యక్తం చేస్తూ, వెంటనే స్పందించి జిల్లాలో డీజిల్ సరఫరాను సక్రమంగా పునరుద్ధరించాలని ప్రభుత్వం, సంబంధిత అధికారులను కోరుతున్నారు.
About The Author
