రాత్రికి రాత్రే చిరు వ్యాపారుల దుకాణాలు నేలమట్టం.. వస్తువులు తీసుకునే అవకాశం కూడా ఇవ్వలేదని ఆవేదన
హనుమకొండ, అక్టోబర్ 13 (ఈ69న్యూస్)
హనుమకొండలోని సెకండ్ గేటు వద్ద ఫుట్‌పాత్‌ను ఆనుకుని చిరు వ్యాపారాలు చేసుకుంటూ జీవనం సాగిస్తున్న పలువురి దుకాణాలను మున్సిపల్ అధికారులు తొలగించడం స్థానికంగా చర్చనీయాంశంగా మారింది. తమ జీవనాధారమైన దుకాణాలను రాత్రికి రాత్రే కూల్చివేశారని చిరు వ్యాపారులు ఆరోపిస్తున్నారు.ఏళ్లుగా చిన్నచిన్న వ్యాపారాలు చేసుకుంటూ కుటుంబాలను పోషించుకుంటున్న తమకు ముందస్తు సమాచారం ఇచ్చారా? లేదా? అనే ప్రశ్నలు బాధితుల నుంచి వ్యక్తమవుతున్నాయి. కనీసం దుకాణాల్లో ఉన్న వస్తువులు, పండ్లను బయటకు తీసుకునే అవకాశం కూడా ఇవ్వకుండా నేలమట్టం చేశారని వ్యాపారులు ఆవేదన వ్యక్తం చేస్తున్నట్లు సమాచారం.రోజువారీ వ్యాపారమే జీవనాధారంగా ఉన్న తమకు ఈ ఘటనతో తీవ్ర నష్టం వాటిల్లిందని బాధితులు వాపోతున్నారు. ఇప్పటికే ఆర్థిక ఇబ్బందులతో సతమతమవుతున్న తమపై దుకాణాల తొలగింపు రూపంలో మరో భారం పడిందని ఆవేదన చెందుతున్నారు.ఫుట్‌పాత్‌లపై ఆక్రమణల తొలగింపు అవసరమే అయినప్పటికీ, చిరు వ్యాపారుల జీవనోపాధి దెబ్బతినకుండా అధికారులు తగిన చర్యలు తీసుకోవాల్సిన అవసరం ఉందనే అభిప్రాయాలు వ్యక్తమవుతున్నాయి. తొలగింపుల సమయంలో వ్యాపారులకు ముందస్తు సమాచారం ఇచ్చారా? వారి వస్తువులను భద్రపరుచుకునే అవకాశం కల్పించారా? అనే అంశాలపై స్పష్టత రావాల్సి ఉంది.జీవనాధారం కోల్పోయిన చిరు వ్యాపారులకు న్యాయం చేయాలని, జరిగిన నష్టంపై అధికారులు స్పందించి తగిన సహాయం అందించాలని బాధితులు కోరుతున్నారు. ఈ ఘటనపై మున్సిపల్ అధికారుల వివరణ తెలియాల్సి ఉంది.
About The Author
