ఎస్సీ సామాజిక వర్గానికి కేటాయింపుతో అవకాశం కోరుతున్న యూత్ కాంగ్రెస్ మండల అధ్యక్షుడు
పార్టీ కోసం చేసిన పోరాటాలు, నిర్వహించిన బాధ్యతలను గుర్తించాలని ఎమ్మెల్యే కడియం శ్రీహరికి విజ్ఞప్తి
జాఫర్‌గడ్, అక్టోబర్ 14 (ఈ69న్యూస్)
స్టేషన్ ఘన్‌పూర్ వ్యవసాయ మార్కెట్ కమిటీ చైర్మన్ పదవి కోసం జాఫర్‌గడ్ మండల యూత్ కాంగ్రెస్ అధ్యక్షుడు తాటికాయల రాజేందర్ తన ప్రయత్నాలను ముమ్మరం చేస్తున్నారు. ఈ పదవి ఎస్సీ సామాజిక వర్గానికి కేటాయించడంతో, పార్టీ కోసం ఎన్నో ఏళ్లుగా పనిచేస్తున్న తనకు అవకాశం కల్పించాలని ఎమ్మెల్యే కడియం శ్రీహరిని కోరుతున్నట్లు తెలిపారు.
2012 నుంచి కాంగ్రెస్ పార్టీతోనే రాజకీయ ప్రస్థానం
2012 నుంచి కాంగ్రెస్ పార్టీకి అంకితభావంతో పనిచేస్తున్నానని రాజేందర్ పేర్కొన్నారు. పార్టీ ప్రతిపక్షంలో ఉన్న సమయంలోనూ అనేక ఇబ్బందులు ఎదుర్కొన్నానని, పార్టీ ఉద్యమాల్లో పాల్గొన్న క్రమంలో తనపై కేసులు నమోదై జైలు జీవితం కూడా అనుభవించాల్సి వచ్చిందని గుర్తుచేశారు. ఆర్థికంగా నష్టాలు ఎదురైనా పార్టీని వీడకుండా కాంగ్రెస్ సిద్ధాంతాలకు కట్టుబడి పనిచేశానని తెలిపారు.నియోజకవర్గ యూత్ కాంగ్రెస్ అధ్యక్షుడిగా, సామాజిక మాధ్యమాల విభాగం నియోజకవర్గ ఇన్‌చార్జిగా, మండల కాంగ్రెస్ అధికార ప్రతినిధిగా వివిధ బాధ్యతలు నిర్వహిస్తూ పార్టీ బలోపేతానికి కృషి చేసినట్లు వివరించారు.
జాఫర్‌గడ్‌ను వరంగల్ జిల్లాలో కలపాలని ఉద్యమం
2019లో జరిగిన ఎంపీటీసీ ఎన్నికల్లో జాఫర్‌గడ్ ఎంపీటీసీ-2 స్థానం నుంచి కాంగ్రెస్ అభ్యర్థిగా పోటీ చేసి స్వల్ప ఓట్ల తేడాతో ఓటమి పాలైనట్లు రాజేందర్ తెలిపారు. తెలంగాణ ఉద్యమ సమయంలోనూ చురుకుగా పనిచేసినట్లు పేర్కొన్నారు.జాఫర్‌గడ్ మండలాన్ని జనగామ జిల్లాలో కలపడాన్ని వ్యతిరేకిస్తూ, తిరిగి వరంగల్ జిల్లాలో కలపాలని డిమాండ్‌తో కాంగ్రెస్ పార్టీ ఆధ్వర్యంలో మూడు నెలల పాటు ధర్నాలు, రాస్తారోకోలు నిర్వహించినట్లు చెప్పారు. ఈ పోరాటంలో తనపై కేసులు నమోదై రెండుసార్లు జైలుకు వెళ్లాల్సి వచ్చిందని, ఇప్పటికీ న్యాయస్థానానికి హాజరవుతున్నానని వివరించారు.
పార్టీ అభ్యర్థుల విజయానికి కృషి
నియోజకవర్గంలో జరిగిన పలు ఎన్నికల్లో కాంగ్రెస్ పార్టీ అభ్యర్థుల విజయానికి తన వంతు కృషి చేశానని రాజేందర్ తెలిపారు. ఇటీవల జరిగిన పార్లమెంట్ ఎన్నికల్లో కాంగ్రెస్ అభ్యర్థి కడియం కావ్యకు జాఫర్‌గడ్ మండలంలో మెజారిటీ సాధించేందుకు పార్టీ శ్రేణులతో కలిసి పనిచేసినట్లు పేర్కొన్నారు. గ్రామ పంచాయతీ ఎన్నికల్లోనూ కాంగ్రెస్ అభ్యర్థుల గెలుపు కోసం కృషి చేసినట్లు తెలిపారు.రాహుల్ గాంధీని దేశ ప్రధానమంత్రిగా చూడాలనే ఆకాంక్షతో పార్టీ సిద్ధాంతాలకు అనుగుణంగా నేటికీ యూత్ కాంగ్రెస్ మండల అధ్యక్షుడిగా కొనసాగుతున్నానని చెప్పారు.
సేవలను గుర్తించి అవకాశం కల్పించాలని విజ్ఞప్తి
తన రాజకీయ ప్రస్థానం, పార్టీ పట్ల విధేయత, ప్రతికూల పరిస్థితుల్లోనూ కాంగ్రెస్ జెండాను వీడకుండా కొనసాగించిన సేవలను పరిగణనలోకి తీసుకొని స్టేషన్ ఘన్‌పూర్ ఎమ్మెల్యే కడియం శ్రీహరి మార్కెట్ కమిటీ చైర్మన్ పదవికి అవకాశం కల్పిస్తారని ఆశిస్తున్నట్లు తాటికాయల రాజేందర్ తెలిపారు.ఎస్సీ సామాజిక వర్గానికి చెందిన కాంగ్రెస్ కార్యకర్తగా, పార్టీ కోసం ఎన్నో ఏళ్లుగా పనిచేసిన తనకు అవకాశం కల్పిస్తే రైతుల సమస్యల పరిష్కారానికి, వ్యవసాయ మార్కెట్ అభివృద్ధికి తన వంతు కృషి చేస్తానని రాజేందర్ ఆశాభావం వ్యక్తం చేశారు.
About The Author
