కొమురం భీమ్కు ఘన నివాళి
“జల్–జంగల్–జమీన్” కోసం కొమురం భీమ్ పోరాటం.. నేటి ఆదివాసీ తరానికి అదే స్ఫూర్తి!
ఆదివాసీ హక్కుల పరిరక్షణకు బిఆర్ఎస్ అండగా నిలుస్తుంది: లక్ష్మణ్ బాబు
ఏటూరునాగారం: ప్రపంచ ఆదివాసీ దినోత్సవాన్ని పురస్కరించుకుని ఏటూరునాగారం మండల కేంద్రంలోని వై-జంక్షన్ వద్ద ఉన్న ఆదివాసీ పోరాటయోధుడు, అమరవీరుడు కొమురం భీమ్ విగ్రహానికి ములుగు జిల్లా బిఆర్ఎస్ పార్టీ అధ్యక్షులు కాకులమర్రి లక్ష్మణ్ బాబు పూలమాల వేసి ఘనంగా నివాళులర్పించారు. ఈ సందర్భంగా లక్ష్మణ్ బాబు మాట్లాడుతూ.. “జల్–జంగల్–జమీన్” నినాదంతో ఆదివాసీల హక్కులు, ఆత్మగౌరవం, స్వయంపాలన కోసం కొమురం భీమ్ సాగించిన పోరాటం చరిత్రలో చిరస్థాయిగా నిలిచిపోయిందన్నారు. అడవులు, భూములు, సహజ వనరులపై ఆదివాసీల హక్కుల కోసం ఆయన చేసిన పోరాటం నేటి తరానికి స్ఫూర్తిదాయకమని పేర్కొన్నారు. ఆదివాసీల సంస్కృతి, సంప్రదాయాలు, జీవన విధానం, హక్కులు మరియు ఆత్మగౌరవాన్ని కాపాడుకోవాల్సిన బాధ్యత ప్రతి ఒక్కరిపై ఉందన్నారు. ఆదివాసీ ప్రాంతాల సమగ్ర అభివృద్ధితో పాటు విద్య, వైద్యం, ఉపాధి, మౌలిక వసతులు మరియు యువతకు మెరుగైన అవకాశాల కోసం నిరంతరం కృషి చేయాల్సిన అవసరం ఉందని తెలిపారు. ఆదివాసీ సమాజం ఎదుర్కొంటున్న సమస్యల పరిష్కారానికి ప్రభుత్వాలు ప్రత్యేక దృష్టి సారించాలని, ఆదివాసీలకు రాజ్యాంగం కల్పించిన హక్కులు పూర్తిస్థాయిలో అమలు కావాలని లక్ష్మణ్ బాబు కోరారు. ఆదివాసుల సంక్షేమం, అభివృద్ధి మరియు హక్కుల పరిరక్షణ కోసం BRS పార్టీ ఎల్లప్పుడూ అండగా నిలుస్తుందని స్పష్టం చేశారు. కొమురం భీమ్ ఆశయాలను స్ఫూర్తిగా తీసుకుని ఆదివాసీ సమాజం ఐక్యంగా ముందుకు సాగాలని పిలుపునిస్తూ, ఏటూరునాగారం ఏజెన్సీ ప్రాంత ప్రజలందరికీ ప్రపంచ ఆదివాసీ దినోత్సవ శుభాకాంక్షలు తెలిపారు. ఈ కార్యక్రమంలో BRS పార్టీ స్థానిక నాయకులు, ప్రజాప్రతినిధులు, కార్యకర్తలు, యువకులు, ఆదివాసీ సంఘాల ప్రతినిధులు, అభిమానులు తదితరులు పెద్ద సంఖ్యలో పాల్గొన్నారు.
About the Author
