మండల టాపర్గా వంగ పల్లవి.. 100 శాతం ఉత్తీర్ణతతో విద్యాశాఖ రికార్డు!
మండల టాపర్గా వంగ పల్లవి.. 100 శాతం ఉత్తీర్ణతతో విద్యాశాఖ రికార్డు!
తెలుగు గళం న్యూస్ భూపాలపల్లి రేగొండ
జయశంకర్ భూపాలపల్లి జిల్లా రేగొండ మండల విద్యా చరిత్రలో 2025-26 విద్యా సంవత్సరం ఒక సువర్ణ అధ్యాయంగా నిలిచిపోనుంది. నేడు విడుదలైన పదో తరగతి ఫలితాల్లో మండలం అద్భుతమైన విజయకేతనం ఎగురవేసింది. మండలంలోని ప్రభుత్వ, ప్రైవేటు పాఠశాలలు పోటాపోటీగా రాణించి వందకు వంద శాతం ఉత్తీర్ణతను నమోదు చేయడం విశేషం.ఈ అసాధారణ ఫలితాలపై మండల విద్యాధికారి (ఎంఈఓ) ప్రభాకర్ హర్షం వ్యక్తం చేస్తూ,రేగొండ విద్యాశాఖ సత్తాను జిల్లా వ్యాప్తంగా చాటిచెప్పిన విద్యార్థులకు అభినందనలు తెలిపారు.
మేటిగా నిలిచిన ప్రతిభావంతులు
ఈ ఏడాది ఫలితాల్లో మండల స్థాయి ర్యాంకుల కోసం విద్యార్థుల మధ్య అత్యంత కఠినమైన పోటీ నెలకొంది.కేవలం ఒక్క మార్కు వ్యవధిలోనే మొదటి మూడు స్థానాలు ఖరారవ్వడం గమనార్హం.
ప్రథమ స్థానం మండల కేంద్రంలోని వాణి విద్యానికేతన్ ఉన్నత పాఠశాలకు చెందిన విద్యార్థిని వంగ పల్లవి 600 మార్కులకు గాను 567 మార్కులు సాధించి ‘మండల టాపర్’గా నిలిచారు.తన అద్భుత ప్రతిభతో పాఠశాలకు,మండలానికి గర్వకారణంగా నిలిచారు.
ద్వితీయ స్థానం రేగొండ ఎంజేపీ (MJP) బాయ్స్ పాఠశాలకు చెందిన కె. అరవింద్ 566 మార్కులు సాధించి తృటిలో ప్రథమ స్థానాన్ని చేజార్చుకున్నప్పటికీ, మండల స్థాయిలో రెండో ర్యాంకును కైవసం చేసుకుని సత్తా చాటారు.
తృతీయ స్థానం అదే ఎంజేపీ బాయ్స్ పాఠశాలకు చెందిన పి. రాజ్ కుమార్, డి.శివ రుత్వీక్ లు ఇద్దరూ తలా 565 మార్కులు సాధించి సంయుక్తంగా మండల మూడో స్థానాన్ని దక్కించుకున్నారు.
విద్యాశాఖ సమష్టి కృషికి నిదర్శనం
మండల వ్యాప్తంగా ఉన్న మొత్తం 10 ఉన్నత పాఠశాలల నుండి ఈ ఏడాది 221 మంది విద్యార్థులు పరీక్షలకు హాజరయ్యారు.ఫలితాల్లో ఈ 221 మంది విద్యార్థులూ ఉత్తీర్ణులై,రేగొండ మండలం 100% (వంద శాతం) ఫలితాలను సాధించడం ఒక గొప్ప మైలురాయిగా నిలిచింది. ప్రైవేటు పాఠశాలలకు ఏమాత్రం తీసిపోకుండా ప్రభుత్వ, గురుకుల పాఠశాలలు కూడా అత్యుత్తమ ఫలితాలు సాధించడంపై సర్వత్రా ప్రశంసలు వ్యక్తమవుతున్నాయి.
హర్షం వ్యక్తం చేసిన అధికారులు,తల్లిదండ్రులు
ఈ సందర్భంగా ఎంఈఓ ప్రభాకర్ గారు మాట్లాడుతూ..ఉపాధ్యాయులు ప్రణాళికాబద్ధంగా విద్యార్థులను పరీక్షలకు సిద్ధం చేయడం,వెనుకబడిన విద్యార్థులపై ప్రత్యేక శ్రద్ధ వహించడం వల్లే ఈ అద్భుత విజయం సాధ్యమైందని కొనియాడారు.విద్యార్థుల కఠోర శ్రమకు, తల్లిదండ్రుల ప్రోత్సాహం, ఉపాధ్యాయుల మార్గదర్శకత్వం తోడై ఈ విజయానికి బాటలు వేశాయని పేర్కొన్నారు.మండల స్థాయి ర్యాంకులు సాధించిన విద్యార్థులను ఆయా పాఠశాలల ప్రధానోపాధ్యాయులు,ఉపాధ్యాయులు స్థానిక ప్రజాప్రతినిధులు ఘనంగా అభినందించారు.
About the Author
